Финляндие стажировкае ветлӥзы Удмуртиысь дышетӥсьёс

    Финляндие стажировкае ветлӥзы удмуртиысь дышетӥсьёс 1

    «Ми учким дышетон вӧлметэз: кызьы радъямын школаос, университетъёс, кыӵе вань луонлыкъёс, Финляндилэсь дышетон сӧзнэтсэ. <…> Соослэн сӧзнэтэз, структураез капчигес, капчигес учебникъёс, шудыса сямен отын кызьы ке но радъямын, туж ӧжыт стрессовой ситуациос нылпиослы «, — вера Финляндие стажировкаез огез радъясь, Ижкарысь «Столичный» лицейысь историяя но обществознаниея дышетӥсь Наталья Дмитриева.

    Финляндие Ижкарысь 6 дышетӥсьёс вуылӥзы: «Столичной» лицейысь, 22 номеро лицейысь но Кузебай Герд нимо гимназиысь.

    Наталья Дмитриевалэн кылъёсызъя, соос трос пӧртэм ӧнерчиосын пумиськылӥзы. Хельсинкиысь университетысь эскерисен, кылосбур тодосъя кандидатэн Светлана Едыгарова-Мантелеен, «Обучение через феномены в Финляндии» учебникез гожтӥсен, профессорен Кирсти Лонкаен но мукетъёсыныз.

    Дышетӥсьёс Хельсинкиысь Тодосъя но лулчеберетъя центрын вераськизы, Хельсинки университетысь профессоръёсын но ӧнерчиосын пумиськизы, нылпи садъёсы, школаосы вуылӥзы. Огаз школаын ӟуч кылъя дышетӥсьлы 9-тӥ классысь пиналъёслы урок нуыны но юрттӥзы.

    «Милям школамы выль, ми адӟим, милям аламагес ӧвӧл шуыса. Но кӧт ӝож, тани Финляндиын котькыӵе школае пыр, соослэн гуртын-а, городын-а, одӥг кадь радъямын ваньмыз. Нош асьмелэн туж бадӟым вис луэ. Соин ик милям тани озьыгес ик ке, мукет школаосысь дышетӥсьёс нош милям таиз ӧвӧл, соиз ӧвӧл, таиз мукет сямен шуылӥзы», — вера  Наталья Дмитриева.

    Дышетӥсьлэн верамезъя, оштолэзь пумын со нош ик Финляндие мыноз, табере пиналъёсын. Нош 12-16 куартолэзе Финляндие стажировкае покчи классъёсты дышетӥсьёс ветлозы.

    Ватсалом, стажировкалэсь программазэ «Финно-угорская точка» дышетонъя но лулчеберетъя центрлэн кивалтӥсез Эдуард Хакимов радъяз.

    https://udmurt.media/udm/news/obrazovanie-i-nauka/53576/