Фин-угор кылъёсты огазеяз кылбур
Кылбурез ӟуч кылын гожтӥз Ханты-Мансийскысь Алла Иштимирова-Посохова кылбурчи, актриса. Со вордскемын Ханты-Мансийск автономной округысь Полноват каргуртын, ужамын обь-угор калыкъёслэн «Солнце» театразы, али Ханты-Мансийскысь библиотекаысь шаертодонъя отделын тырше. Кылбуръёсыз антологиосын но бичетъёсын печатласько.
— Выжыям хантыос но, мансиос но вань, но, жаляса верано, та кылъёсын уг гожъяськиськы, — вера Алла. — Но куддыр шӧдӥсько, кыӵе ке мылкыдэз возьматыны мыным ӵапак та кылъёс уг тырмо шуыса. Огпол мон малпай: нош ханты но манси кылъёсын кылбуръёсы кызьы чузъяськысалзы? «Загляну в свою ладонь» кылбурме та кылъёсы берыктӥзы калык сям-йылолъёсты ӟеч тодӥсь кышномуртъёс Евдокия Нёмысова но Светлана Динисламова — мынам визьнодасьёсы, визь-кенеш сётӥсьёсы.
Та кылбурез А. Иштимирова-Посохова 2010-тӥ арын гожтэм, нылпи вакытсэ тодаз вайыса, анай-атай музъемезлы чуръёссэ сӥзьыса. «Тани Обь бызе, нош татын — Иртыш. Нош таиз — кызьпу вай…» — шуылэм пичи Аллалы песятаез Павел Тарасович Костин, нунокезлэсь кырымпыдэссэ учкыса.
Ханты но манси кылъёсын кылбурзэ лыдӟыса, авторлэн мылкыдыз ӝутскем кылбурзэ мукет фин-угор кылъёсын лыдӟыны. Малпанэз быдэсмиз: кылбурез берыктӥзы удмурт, эрзя, пор, карел, коми-зырян, вепс, мадьяр, фин, эстон но мукет кылъёсы. Озьы ог 30 мурт книгаез дасяны юрттӥз.
— Юрттэт курыса, вазиськи тодмоосылы, эшъёсылы, — вера Алла. — Соос асьсэлэн тодмооссылэсь юалляськизы. Туала вакытэ вотэсын кусып радъяны секыт ӧвӧл. Озьы Россиысь но кунгож сьӧрысь 16 берыктӥсьёсты шедьтӥм. Ваньзы ас мылкыдзыя книгаез дасян борды итӥськизы — таизлы туж шумпотӥсько. Книгаез поттыны юрттӥзы соос, кинлы зэм но кельше гожъяськыны, кылысь кылэ берыктыны, фин-угор эшъёссылы юрттӥськыны.
Со сяна, котькуд берыктэм текст борды аспӧртэм суред пуксиз. Суредъёсты озьы ик лэсьтӥзы пӧртэм фин-угор художникъёс. Берыктӥсьёс но суредаськисьёс сярысь лыдӟыны луэ книгалэн пумаз.
Удмурт кылэ кылбурез берыктӥз Анастасия Шумилова кылбурчи, суредэз лэсьтӥз Чудья Жени художник.