Философской но лирической кырӟанъёс но рэп чузъяськозы «Элькуновидение» вожвылъяськонын Ижкарын
Вожвылъяськонлэн кыкетӥ люкетаз ӧз шеде Балезино ёросысь но Башкириысь Татышлы ёросысь кырӟанъёс. Кызьы валэктӥзы радъясьёс иворъёсъя «Удмуртия» агентстволы, Балезино ёросысь кырӟась Надежда Сидорова семьяяз кылдэм ужпумъя конкурсэ пыриськыны пумит луиз, нош Башкириысь Лилиана Нуриахметовалэн кырӟанэз куронъёслы ӧз тупа — кылъёсыз бигер кылысь берыктэмын вылэм.
21-тӥ коньывуонэ «Аксион» культура дворецлэн сцена вылаз 19 кырӟасьёс но коллективъёс потозы.
Вожвылъяськонэ арысь аре пырисько Шаркан ёросысь кырӟасьёс. Туэ солэсь данзэ утёз егит кырӟась, Кыква школаысь крезьгуръя дышетӥсь, ёросазы ортчытэм конкурсын вормись Александра Протопопова. Солы кырӟан гожтӥз Татьяна Хохрякова, 2014-тӥ арын ӵапак солэн кырӟанэныз вормиз вал «Тулкым» ансамбль.
«Кылэме вал Саша Протопопова сярысь со ӟеч кырӟа шуыса. Телефон пыр герӟаськем берам нырысетӥ юанэ вал: „Саша, тыныд кыӵе кулэ кырӟан — куарадэ-а возьматоно тынэсьтыд, быгатонлыктэ яке тыныд кыӵе ке но шулдырзэ кулэ?“. Со шуиз: „Мыным кулэ, мед луоз со чебер куараез возьматон“. Куке Саша потӥз сцена вылэ ёрос конкурсын, куаралэсь быгатонлыксэ сётэменыз шуом-а, мар-а, калыклэн сюлэмъёсазы ик пыриз, вылтыр юзыр-кезьыр луиз», — вераз иворъёсъя «Удмуртия» агентстволы Татьяна Хохрякова.
Ижкарысь Устинов ёрос вожвылъяськонэ пыриськыны Алексей Пикулевлы оскиз. Егит кылзӥсьёслы со умой тодмо луэ рэп быдэстӥсь сямен.
«Озьы ик со луоз рэп, но кӧня ке поп-кырӟанлы матынгес, малы ке шуоно таӵе конкурс шуыса, мон малпай сое гожтыны мукетгес карыса. Быдэсак кылӥське мукетгес, азьло кырӟанъёсыным ӵошатыса. Кемалась ик ӧвӧл ай бертӥ армиысь, соин ик трос кужыме люкаськиз, мылкыды кыӵе ке но выль ужъёс кылдытыны. Соин ик куке мон тодӥ „Элькуновидение“ конкурс ортче шуыса, мон малпай эскерыны луэ шуыса пыриськы», — вераз Алексей Пикулев.
Тодэ вайытом, вожвылъяськонлэн кыкетӥ люкетэз 21-тӥ коньывуонэ «Аксион» культура дворецын ортчоз. Таяз арын кырӟанъёсты дунъян радлыке воштонъёс пыртэмын — вормисез быръёзы кык пумо жюриен пуктэм баллъёсъя. Нош конкурслэн йылпумъян люкетаз, 4-тӥ шуркынмонэ, смс-куараосъя тодмо луоз, кин басьтоз учкисьёслэсь кузьымзэс.