«Этномир» парк- музейлэн интывылаз Удмуртилэн коркаез кылдытэмын луоз

Ужкагазъёс улэ асьслэсь кинюртэмъёссэс пуктӥзы Удмуртилэсь тӧроезлэсь ужзэ быдэсъясь Александр Бречалов но «Этномир» ӵектослэн кивалтӥсез Руслан Байрамов. Тупанкылъя, культурая центрын Удмуртилэн представительствоез усьтӥськоз – удмуртъёслэн йӧскалык этноюртъерзы. Отын возьматӥськоз шаерысьтымы архитектура, пӧртэм выжыысь калыкъёслэн сиён пӧран амалъёссы, киужъёссы.

Александр Бречалов пусйиз: «Удмуртилы, кудӥз али гинэ аслэсьтыз брендзэ кылдытэ, сое азинтыны одно ик кулэ выль площадкаос».

«Этномир», кудӥз Калуга вӧзы интыяськемын, соос пӧлысь уката азинлыкоез. Отын Россиысь портэм калыкъёс пӧлын кусыпъёсты  юнматын ужпум пуктэмын. Ужлэн пайдалыкез сярысь вера лыдпус — миым «Этномир» центре миллион 700 сюрс мурт вуылӥз.

«Этномирлэн» интывылаз  кылдытэм Удмурт Элькунлэн экспозицияз луоз музей висъетэз, презентациосын но конференц зал, кафе, кунокуа. Чаклано ке, отын Удмуртилэсь этнотодметсэ гинэ возьматыны ӧжыт, промышленной люкетэзлы но инты кулэ — вераз Элькун тӧролэсь ужзэ быдэсъясь.

«Этномир» центрысь ӧнерчиос юрттӥськозы Элькунамы этногуртэз кылдытон ужын. Шаерысьтымы культурая йӧскалык огазеяськонъёслэн азьветлӥсьёссы кӧня ке пумиськонъёс-кенешонъёс ортчытӥзы ни.

Али этногуртлы инты шедьтон но концепцизэ кылдытон ласянь уж нуиське. Ӵектонъёс вань этногуртэ 20 пала юртъёсын экспозициос лэсьтыны. Котькудаз  улосысьтымы пӧртэм выжыысь калыкъёс лулчеберетсэс возьматозы.

Элькун тӧролэсь ужзэ быдэсъясь Александр Бречалов  пусйиз: «Азьланяз та проект  федерациын одӥгез бадӟымез луыны быгатоз. Озьы ик этногурт инвестициосты кыскон ласянь выль огъет луоз. Солэсь бизнес люкетсэ радъяны ӵапак юрттӥськозы «Этномир» центрысь экспертъёс».