Этногурт кылдытон сярысь вераськиз Александр Бречалов йӧскалык огазеяськонъёслэн кивалтӥсъёсынызы

Сое кылдытонъя Элькун тӧролэсь ужзэ быдэсъясь Александр Бречалов йӧскалык огазеяськонъёслэн кивалтӥсъёсынызы «Лудорвай» музей-заповедникын пумиськылӥз.

Этногурт — та малпан выль ӧвӧл. Проектъёс Россилэн пӧртэм улосъёсаз кемалась уло ни. Тужгес бадӟымез проект — этномир. Со Калуга улосын. Отысь 83 гектар вылын быдэс дунне интыямын.

Проект кылдытӥсен, Руслан Байрамовен, тодматӥз пумиськонэ вуэмъёсты Александр Бречалов. «Удмуртиез та бадӟым проектын – «Лудрвай» музейын вуко гинэ возьматэ, нош со туж куанер, — пусйиз кивалтӥсь. — Шаермы одно ик та проектэ пыриськоз. Ӵектос ужбергатӥсьёслэн юрттэменызы улонэ пыӵаны кулэ».

«Лудорвай» музей-заповедник пумиськон интылы юнме быръемын ӧй вал. Этногурт сярысь вераськон потэм бере ик, со «Лудорвайын» интыяськоз шуыса малпан но кылӥськыны кутскиз.

Бречалов пусйиз: «Лудорвай» музеез, солэсь музъемзэ уз исалэ, заповедниклэн аслаз азинскон сюресэз». Пумиськонэ вуэм йӧскалык огазеяськонъёслэн тӧрооссы но инты яке карын, яке кар бордын луыны кулэ шуыса веразы.

Та выль проект гинэ ӧвӧл, оглом лулчеберет, выжы калыкъёслэн шулдыръяськонъёссы но экономикаез азинтыны юрттыны кулэ — пусъе Александр Бречалов. Соос пыр тросгес но тросгес калык Удмуртия сярысь тодыны, шаеренымы тунскыкъяськыны кулэ.