Этнографияя бадӟым диктант гожтозы 3-тӥ шуркынмонэ

Этнографияя бадӟым диктант Россиысь вань 85 улосвылъёсын но куд-ог артысь кунъёсын: Азербайджанын, Армениын, Белоруссиын, Казахстанын, Кыргызстанын, Молдоваын, Таджикистанын, Туркменистанын, Узбекистанын, Абхазиын но Лымшор Осетиын ортчоз. Огъя 1500 площадкаос кылдытэмын луозы.

«Туэ ужрад калыккуспо инлык басьтӥз. Кылем арын бадӟым диктантэз Турциын но Швейцариын гинэ гожтизы ке, туэ сыӵе луонлыксы кылдӥз матысь кунъёсын улӥсьёслы но. Озьы акцие пыриськыны быгато ваньмыз, кин тунсыкъяське Россиын улӥсьёслэн лулчеберетэнызы, сям-йылолъёсынызы», — шуиз йӧскалык ужпумъёсъя Федерал агенстволэн кивалтӥсез Игорь Баринов.

Этнографияя бадӟым диктантэз гожтон понна вазиськыны кулэ сое гожтонъя кылдытэм площадкае яке кунгож сьӧрысь Россотрудничестволэн представительствояз. Адресъёсты шедьтыны луоз  www.miretno.ru но http://fadn.gov.ru сайтъёсысь. Озьы ик Этнографияя бадӟым диктантлэн вотэсбамысь группаысьтыз.

Диктант гожтонъя 1500 площадкаос ужалозы. Тужгес но трос Удмуртиын (210) но Красноярск улосын (137).

Этнографияя бадӟым  диктантлэсь йылпумъянъёссэ Росси Конституцилэн нуналаз – 12-тӥ толсуре, шараялозы.

Кылем арын Этнографияя бадӟым диктантэз 90 сюрс пала адямиос гожтӥзы: 35 сюрсэз очно амалэн, 50 сюрсэз – онлайн пыр. Тужгесно егитэз луиз Ульяновск улосвылысь 12 аресъем нылаш, нош тужгес но арлыдоез – Мордовиысь 80 аресъем воргорон.