Эстониыын ужзэ мытоз фин-угор писательёслэн конгрессы
Вера Франциысь Шундыӝужан палась калыкъёсъя но кылъёсъя институтысь (INALCO) финноугроведениея профессор, фин-угор литератураослэн ассоциацизылэн вице-президентэз Эва Тулуз:
«Кылем арын конгресс Венгриын ортчиз. Сое радъяз Фин-угор литератураослэн ассоциацизылэн азьмуртэз Янош Пустаи. Янош Пустаи лэсьтӥз мертантэм бадӟым уж: улонэ пыӵатӥз «12 тужгес чебер кылбуръёс» проектсэ. Котькуд фин-угор калыкез 12 тужгес чебер кылбуръёссэ бырйыны куриз, соосты со берыктӥз вань фин-угор кылъёсы — вепсысен кутскыса ханты кылозь. Озьы оглом 36 бичет потӥз — со туж бадӟым уж.
Кылем арын конгресс сӥземын вал фин-угор калыкъёслэн драматургизылы, туэ — историзылы, кызьы со возьматэмын литератураосын. Та сярысь доклад чузъяськоз пленарной заседаниын. Собере люкиськомы секциосы, писательёс литератураын тужгес сюлмаськытӥсь ужпумъёс сярысь вераськон ӝутозы.
Кӧня конгрессъёс радъяллямы ни, саамъёс отчы туж ик уг пырисько. Туэ но луоз одӥг мурт гинэ, со но лыктоз финъёсын ӵош. Саамъёслэн куспазы пумиськылыны мукет амалъёссы вань. Соослы тунсыкогес Арктической форумъёс. Мон кылем арын шуркынмонэ Парижын радъяй саамъёслы сӥзем нунал — отчы соос вуылӥзы, та конгрессэ нош уг пырисько. Ненецъёс озьы ик туэ палэнэ кылизы. Мон соослы гожтэт ыстӥ, конгрессэ ӧтьыса, но ивормы дорозязы вуымтэ. Со ышиз яке администрациын, яке сое писательёс дорозь ӧз вутты огазеяськонзы.
Мон шуысал: ваньмыз адями бордысь потэ — кыӵе адями кивалтэ писательёслэн огазеяськонэнызы, кыӵе адямиос литератураез лэсьто… Басьтом хантыосты. Вераны уг луы, соослэн трос мыло-кыдо писательёссы шуыса, но вань бадӟым нимзы — быдэс Россилы тодмо Еремей Айпин. Вань калыкъёслэн сыӵе тодмо писательёссы ӧвӧл. Со ик хантыослэсь делегацизэс но бичаны турттӥз. Поръёс туж мыло-кыдоесь — конгрессъёсы одно пырисько. Таӵе ужрадъёсы трос егитъёссэс кутыны тыршо эстонъёс.
Удмуртъёс пумысен сюлмы пирсэкъя. Писательёслэн огазеяськонзылэн правлениез конгрессэ делегация люкан пумысен уг сюлмаськы. Нырысь шуизы: нокинлэн конгрессэ мынэмез уг поты, уксё ӧвӧл, егитъёс мынозы ке, мед асьсэ понна мынозы… Мон та югдурез уг валаськы.
Мон туж яратӥсько удмуртъёсты, вань сюлмыным соос понна висисько. Эшшо таяз конгрессын радъяськом удмурт ӝыт. Туэ Михаил Петровлэн «Вуж Мултан» романэз потӥз мадьяр но эстон кылъёсын. Эстон кылэ сое берыктӥзы Арво Валтон Муш Надиен ӵош, венгер кылэ — Иван Хорват, со ӟуч вариантэз вылэ пыкиськиз. Тартуын ми та книгаослы презентация лэсьтом, соку ик AR-GOD эстон-удмурт группа кырӟанъёссэ быдэстоз».
Ватсаса: конгресслэн ужаз пыриськозы удмурт гожъясьёс: Мария Векшина, Лара Дмитриева, Александр Егоров, Ирина Самигулова, Ирина Кабипянова.