Дом Дружбы народов

    Эшъяськон юртысь ӧнерчиос «Тулкыме» вуылӥзы

    Эшъяськон юртысь ӧнерчиос «тулкыме» вуылӥзы 1

    Та нуналъёсы Иж котырысь «Ёлочка» лагерьын удмурт пиналъёс шутэтско. Соос понна «Шунды» огазеяськон «Тулкым» лагерез ортчытэ.

    «Тулкым» секыт югдуре шедем нылпиос понна радъяське. Арлы быдэ отын 40 пала пиналъёс тодон-валан люкало, удмурт лулчебертлы матынгес луо. Туэ смена 10-тӥзэ ортче.

    9 нунал ӵоже пиналъёс удмурт фольклорен, вожатойлэн уженыз тодматскозы, видео лэсьтыны но крезьгуро инструментъёсын шудыны дышетскозы. Ваньмон дырзэс яркытгес карозы удмурт кылын ужрадъёс.

    – Пиналъёсмы туж мыло-кыдоесь, – вераз «Тулкым» лагерьлэн кивалтӥсез Кирилл Кириллов, – тунсыко улӥськомы, мӧзмыны дырмы ӧвӧл. Дашетӥсьёсмы рос-прос командалы пӧрмизы ни, оскисько, смена пумозь тазьы ик уломы шуыса.

    Лагерь дыръя пиналъёсты егит удмурт азьветлӥсьёсын пумиськонъёс витё. Кылсярысь, 3-тӥ гудырикошконэ дӥнязы Эшъяськон юртысь ӧнерчиос вуылӥзы: Августина Михайлова Chukinder ӝӧк выл шудонъёсын тодматӥз, Мария Емельянова егитъёслы сӥзем «Дарт» газет сярысь вераз, нош Богдан Анфиногенов интернетысь «Даур ТВ» телеканаллэсь ужзэ возьматӥз.

    Эшъяськон юртысь ӧнерчиос «тулкыме» вуылӥзы 2
    А. Михайлова пиналъёсын «Вожодырен» шудэ
    Эшъяськон юртысь ӧнерчиос «тулкыме» вуылӥзы 3
    Б. Анфиногенов Интернетысь «Даур ТВ» телеканалэн тодматэ

    Пумиськон дыръя пиналъёс куноослы кер потытэк юанъёссэс сётъязы, Богдан Анфиногеновез кырӟаны но куризы. Нош «Видеоискусство» отрядысь пиналъёслы куноосын ӵош ужаны но удалтӥз. Мария Емельянова соослы валэктӥз, кызьы репортаж лэсьтӥське, кызьы интервью басьтӥське, нош Богдан Анфиногенов возьматӥз, кызьы оператор ужаны кулэ. Бӧрысь пиналъёс куноосын ӵош та пумиськон сярысь репортаж снимать каризы.

    Эшъяськон юртысь ӧнерчиослэн «Тулкым» лагере вуылэмзы сярысь сюжет матысь дыре «ВКонтактеысь» «Даур ТВ» огинын потоз.