Эшъяськон юртын «Удмуртия — территория развития» СМИ-ослэн форумзы ортчиз

    Эшъяськон юртын «удмуртия — территория развития» сми-ослэн форумзы ортчиз 1

    Ужрадэ пыриськизы Удмурт Тӧролэн но Правительстволэн администрациенызы кивалтӥсь Сергей Смирнов, Россиысь журналистъёслэн огазеяськонзылэн кивалтӥсезлэн воштӥсез Алексей Вишневецкий, Печатья но ивор вӧлмытонъя агентстволэн кивалтӥсезлэсь ужзэ быдэсъясь Приск Мгои, Кун Думаысь депутат Алексей Загребин, газетъёслэн валтӥсь редакторъёссы, муниципал кылдытэтъёслэн йыръёссы но журналистъёс.

    Нырысь-валысь СМИ-ослэн валтӥсь редакторъёссы Удмуртилэн Правительствоезлэн Тӧроеныз Ярослав Семёновен пумиськылӥзы, ивор поттон удысын кылдылӥсь сюлмаськытӥсь ужпумъёс пумысен кенешизы.

    «Быдэс Удмуртия туннэ — азинскись улосвыл, — пусйиз Ярослав Семёнов. — Улонэ пыӵало 52 йӧскалык проектъёс. Со пумысен вань ивортон калык дорозь валамон карыса вуттэмын луыны кулэ».

    Со бӧрсьы шаерысьтымы вань СМИ-ослэн адӟытонзы усьтӥськиз. Котькудӥз газет-журнал кин маин аспӧртэмлыко возьматыны быгатӥз. Адзытон юбилейлы сӥземын — Удмуртиысь журналистъёслэн огазеяськонзылы 60 ар. Соин но ӧтем куноос пӧлын Россиысь журналистъёслэн огазеяськонзылэн тӧрезлэн воштӥсез  Алексей Вишневецкий. Со шуиз, туннэ Интернет азинскемен но, удыслэн кулэлыкез бадӟым. Журналистика выль технологиосъя, амалъёсъя ужаны тырше.

    Ивор вӧлмытись сӧзнэтын тыршисьёс нырысь ик адямиослэсь тунсыкъяськонъёссэс, сюлмаськонъёссэс санэ басьтыны кулэ — со сярысь пусйиз  Удмурт Тӧролэн но Правительстволэн администрациенызы кивалтӥсез Сергей Смирнов но.