Эшъяськон юртын кылбуранлы сӥзем ӝыт ортчиз
Калыкъёслэн эшъяськон юртазы «Удмурт Кенеш» огазеяськонлэн Ижысь Первомай ёрос ёзэтэз «Марлы, бен, кылбуръёс гожъяськод…» пумиськон-тодматскон ӝыт ортчытӥз.
Ужрад сӥземын вал Ашальчи Окилэн но Кузебай Гердлэн вордскемзы дырысенызы 125 ар тырмонлы.
Пумиськонэ люкаськылӥзы «ВКонтакте» мерлыко вотэсысь «Дунневыл меӵкытонъёс» огинэ гожъяськисьёс но вань мылкыд карисьёс. Люкаськемъёслы капчи мылкыд сӥзизы «Удмурт Кенеш» огазеяськонлэн тӧроез Андрей Ураськин, Йӧскалык прессалэн юртэзлэн кивалтӥсез Зинаида Рябинина, «Удмурт дунне» газетлэн но «Удмурт нылкышно кенешлэн» кивалтӥсез Елена Миннигараева, поэт но прозаик Вячеслав Ар-Серги но мукетъёсыз.
Пумиськон ӝыт улсын пӧртэм ёросъёсысь, пӧртэм арлыдъем кылбурасьёс асэнызы тодматӥзы, асьсэ ужъёссэс шара лыдӟизы, кылбуръёссэс кырӟаса возьматӥзы.
