Эрик Батуев нимо премилэн лауреатъёсыз тодмо луизы Удмуртиын

Таяз арын куриськонъёс сизьым журналистъёслэсь вуизы, соос пӧлын гурт ёросъёсын ужасьёслэсь но. Лауреатъёслэсь нимъёссэс 26-тӥ толсуре «Удмурт Кенешлэн» исполкомез юнматӥз.

«Конкурсъя ӧри одӥг кылэ вуиз, толон исполкомын но юнматӥм ни ми. Таяз учыре 7 кандидатура сётэмын вал, но ми быръён лэсьтӥм куинь кандидатура понна. Пӧртэм удысъёсъя со луиз», — вераз Татьяна Ишматова, «Удмурт Кенеш» огазеяськонлэн тӧроез.

Эрик Батуев нимо премилэн 2018-тӥ ар понна лауреатъёсыз:

• Майя Бывальцева, ивортодэтъя «Удмуртия» агентстволэн редакторез;
• Надежда Максимова, Шаркан ёросысь «Вестник» газетысь журналист;
• Валерий Сидоров, «Удмуртия» кун телерадиокомпаниысь тележурналист.

Ватсалом, йӧскалык данъетэн сӥё-дано пусъён толшоре ортчоз.

Тодэ вайытом, «Удмурт Кенеш» огазеяськонлэн кичӧлтэмезъя, Эрик Батуев нимо йӧскалык премия удмурт лулчеберет, история, удмуртъёслэн ужрадъёссы сярысь ивортӥсь журналистъёслы 2011-тӥ арысен сётӥське. 2017-тӥ ар понна данъетэз озьы ик куинь мурт басьтӥз.