«Емыш-fest»

«Шулдыръяськонэ ӧтиськомы Грак ёросын улӥсь вань удмуртъёсты. Ёрос центрлэсь 12 иськеме интыяськем Бадӟым Вожой гуртын выль емышъёсын узыр ӝӧк пуктозы. Валтӥсь инты басьтоз кӧня ке пӧртэм кеньыръёслэсь пӧзьтэм ӝук. Азьвыл аръёсты тодэ вайыса, 7–9 команда вуоз, оглом 150–200 адями люкаськоз», — вераз Калыкъёслэн эшъяськон юртысьтызы муниципал кылдытэтъёсын ужанъя ёзэтысь ӧнерчи Алексей Медведев.

Шулдыръяськонэ пӧртэм арлыдъем адямиос люкаськозы бере, радъясьёс пиналъёслы но, арлыдоослы но ужрадъёс чаклазы. Нунал ӵоже луозы концерт, быдэ вуымтэослы спортъя «Яблок-шудон» эстафета, нылпиослы «Тодӥськом но вормиськом» шудон программа, семьяослы пӧраськонъя «Ваньмыз будэ! Ваньзэ луэ» вожвылъяськон, киужъёсъя конкурс.

Выль емышлы сӥзем шулдыръяськонэз Грак ёросын арлы быдэ ортчытъяло. Вошъяське интыез но нимыз гинэ. Кылем арын, кылсярысь, куноосты «Виль» праздникын пумитазы Пуклё черкогуртын.