Элькунысь дышетӥсьёс кык кылолыкъя тужгес усто ужан амалъёсын тодматскизы
Семинар кутскиз «Удмурт кенеш» огазеяськонлэн «Билингва. О практиках формирования двуязычия в современной городской среде» ӵектосэныз тодматсконэн. Миым проект азьмурт грантъёсъя Фондэн ялэм вожвылъяськонын вормисе потӥз. Ӵектослэн кивалтӥсез, филологи тодосъёсъя кандидатлэн, Кузёбай Герд нимо гимназилэн кивалтӥсезлэн Татьяна Волковалэн пусъемезъя, проект кык ӧръя ужзэ нуэ – научно-методической но дышетонъя–ваньмон дырез радъянъя. Анай-атайёс но дышетӥсьёс понна кык кылолыкъя юанъёсты сэрртонлы сӥзем семинаръёс ортчо; нылпи психологен, логопедэн, билингвизмъя ӧнерчиосын ӵошен но нимаз кенешонъёс радъясько. Миымысен Ижкарын тодон-валан сётонъя но ваньмон дырез радъянъя «Нуныкай» огъет ужаны кутскиз. Отын нылпиос пӧртэм оръёсъя ужаны дышетско, кылзэс волято. Татьяна Геннадьевна кык кылолыкъя «Билингва» удмурт центрлэн сайтэныз тодматӥз – отысь ӵектос сярысь вань ивортонъёсты, уже кутӥськись амалъёсты шедьтыны луэ.
Кык кылолыкъя ӵектослэн ӧнерчиез, педагоги тодосъёсъя доктор, профессор Ирина Ворожцова семинаре люкаськемъёслы семья куспын вераськон кыллэн бадӟым интыез сярысь пусйиз. Ӵектосысь логопед Татьяна Кудрявцева кык кылэз тодӥсь нылпиослэн вераськонзылэн азинскемезлэн аспӧртэмлыкъёсыныз тодматӥз. Психолог Ольга Смирнова быдэс группалы консультаци радъяз. Кылсярысь, Ольга Ильинична кык кылэз тодӥсь нылпиосты эскеронъёслэн йылпумъянъёсынызы тодматӥз. «Анай но атай пӧртэм кылъёсын вераськизы ке, валамон, пиналзы но кык кылэз ик тодыса будоз, — пусъе психолог. – Эскеронъёс возьмато, адями кык кылын вераськыны дышемын ке, солэн аспӧртэм быгатонлыкъёсыз кылдо – шуак кылдӥсь югдурлы дунъет сётыны, шонер вамыш лэсьтыны быгатэ. Малпанъёсыз паськытгес ӧръясько, ӵошатоно ке одиг кыл гинэ тодӥсь нылпиосын».
Семинар улсын «Нуныкай» огъетысь ӧнерчиос пӧртэм ӧръёсъя мастер-классъёс ортчытӥзы – крезьгуръя, шудонъёсъя, кылэз волятонъя, калык эктонъя, театръя но киужъёсын выронъя.
«Мон мылысь-кыдысь ваи «Этнокультурное образование детей дошкольного возраста в условиях реализации ФГОСДО» курсъёсы ветлӥсьёсты – вера Удмурт Элькунысь дышетонэз азинтонъя Институтысь ӧнерчи Роза Кузнецова. – Но кылӥ туж ӟеч вазиськонъёсты – кин ке аслыз усьтӥз выль удмурт шудонъёсты, эктонъёсты, кырӟанъёсты – соос табере быгатозы асьсэ нылпиоссэс дышетыны. Нош кинлы ке пайдаё потӥз кык кылолыкъя ӵектосын ужась ӧнерчиослэн вераськонзы. Ӵектосын огез туж пайдалыко ужан амал кутӥське – пӧртэм шудонъёс, вераськон но киужен вырон пыр кылэн тодматон. Вераны кулэ, ужъюртмы трос дыр ӵоже ни огкылысь тырше гимназиен «Организация этнокультурного образования как условие формирования этнокультурной компетентности дошкольников» инноваци ӵектос улсын, кудзэ радъя Удмурт Элькунысь дышетонэз азинтонъя Институт но Кузёбай Герд нимо йӧскалык гимназия. Шумпоттэ соиз но – та семинар милям ӵектонмыя радъяське шуыса».
Семинаре пыриськись мукетыз ӧнерчи — Вотка карысь 44 номеро нылпи садысь воспитатель Галина Перевозчикова – пусъе: «Нылпи садын удмурт кылэз дышетэм сяна, мон карысь «Удмурт нылкышно кенеш» огазеяськонлэн кивалтӥсез луисько. Огез тужгес но секыт ужпум – анай-атайёслы нылпизэс анай кыллы дышетонлэн кулэлыкез сярысь валэктон. Та ласянь мыным туж кельшиз Ольга Смирновалэн дэмланъёсыз».
Ужрадэ пыриськиськисьёс пусйизы, семиранъёсты ёросъёсын но радъяны кулэ шуыса. Кулэлык шӧдӥське. «Туэ сӥзьыл эшшо кык элькун семинар ортчытом Кузёбай Герд нимо гимназиын. Но жаляса верано, та вакыт ёросъёсы потаны луонлык али ӧвӧл» — пусйиз ««Билингва. О практиках формирования двуязычия в современной городской среде»» ӵектослэн кивалтӥсез Татьяна Волкова.