Элькуновидение вожвылъяськонлэн вормисез тодмо луоз 4-тӥ шуркынмонэ

Туэ Элькуновидение конкурсэ пыриськизы 19 ёросъёс но каръёс, озьы ик Татарстанысь кык кырӟасьёс. 21-тӥ коньывуонэ «Аксион» культура дворецын
ёросъёсысь но каръёсысь жюрилэн быръемезъя 14 устооосыз кырӟасьёс но коллективъёс пыризы телеверсие.

Элькуновидение вожвылъяськонэз «Мынам Удмуртие» телеканал «Удмурт Кенеш» огазеяськонэн ӵош дасяло. Вормись кырӟась «Удмурт Кенешлэсь» валтӥсь кузьымзэ — 40 сюрс манет, басьтоз.

Ӵуказе тужгес чебер, вылӥ ӟечлыко кырӟанэз быръёз ужудыслыко жюри. Со понна «Светӥ дорын куноын» телеадӟытонэ ӧтемын луозы искусство но культура удысысь тодмо улосчиосмы. «Аксионын» жюриен сётэм лыдпусъёс вӧзы соос ватсалозы асьсэлэсь балъёссэс.

Дунъясьёс озьы ик шараялозы тужгес усто кылбур но тужгес усто крезьгур гожтисьёслэсь нимъёссэс. Нош учкисьёслэн СМС пыр лэзем куараоссыя тодмо луоз учкисьёсын быръем кырӟась.

http://www.myudm.ru/