«Элькуновидение-2016»

"Туэ «Элькуновидение-2016» конкурс котырес лыдпусо, — вера «Мынам Удмуртие» телерадиокомпаниысь валтӥсь редакторлэн воштӥсез Сергей Касаткин, — табере со улосвылкуспо луиз. Пыриськыны мылкыд каремзэс веразы ини Удмуртилэн палэнысьтыз но кырӟасьёс: Татарстанысь, Башкортостанысь. Чакласьком, вуозы Марий Элысь, Свердловск улосысь но».

Конкурс 3 люкетэн ортчоз. Нырысетӥез луоз 8-тӥ -9- тӥ коньывуонэ — кырӟанъёсты нырысь-валысь кылзон. 22-тӥ коньывуонэ нырысетӥ люкетаз пӧртэм артистъёс сцена вылын быгатонлыкъёссэс возьматозы. Нош конкурслэн йылпумъян люкетэз ортчоз 4-тӥ шуркынмонэ. Соку телеучкисьёс котькудиз понна смс пыр асьэлэсь куаразэс сётозы.