Элькун Герберлэн валтӥсь сцена вадьсаз 7 метръем писпуос ӝутскозы: кызьпу, пужым но кыз

Радъясь комитетэ пыремын режиссёръёс, элькунысь Калыкъёслэн Эшъяськон юртысьтызы ӧнерчиос но Сюмси ёрос администрацилэн ыстэм муртъёсыз. Кенешонын праздникез радъян но солэн пуштросэз сярысь вераськизы.

Элькун Герберлэн режиссёрез Павел Поздеев малпамъя, праздниклэн пуштросэз удмуртъёсын сӥлы карон писпуос котырын кылдытӥськоз. Сыӵе писпуос пӧлын кызьпу, кыз но пужым. Праздник куиньлы люкиськоз: вӧсяськон, шулдыръяськон, гурт удысын азинлыко ужасьёсты пусъён. Валтӥсь сцена вадьсын 7 метръем писпуос ӝутскозы: тӧдьы кызьпу, горд пужым но сьӧд кыз.

Со сяна, радъясь комитетлэн ёзчиосыз йӧскалык праздникез ортчытон дырез выжтон пумысен вераськизы.

Тодэ вайытом, Герберез 18-тӥ инвожое ортчытыны чакламын вал. Но со улонысь кошкем ӵыжы-выжыосты буре ваён нуналэн тупаз. Соин ик Удмуртилэн тӧроез Александр Соловьёв удмурт йӧскалык праздникез 25-тӥ инвожолы выжтон сярысь пуктэт кутӥз. Сюмси ёрос администрацилэн тӧроезлэн воштӥсез Людмила Даровских верамъя, ёросын улӥсьёс дырез выжтонэз умоен пумитазы.

Кенешонын площадкаослэсь нимъёссэс воштон ужпумез но эскеризы. Сяме пыӵамъя, соос сцена вылын мынӥсь возьматонлы тупало вал: «Батыр шудонъёс», «Пичи Гербер» но мукет. Праздниклэн режиссёрез Павел Поздеев котькуд площадкалы писпулэсь нимзэ сётыны ӵектэ, но пуштросэз вылын со нокызьы уз шӧдӥськы.

Нялтас вераса, «Батыр шудонъёсын» вормисьёслы туэ улэп кузьымъёс дасязы: атас, парсьпи но кролик.