Елабугаын ужзэ мытӥз конференци

Отчы Удмуртиысь, Татарстанысь, Башкириысь, Марий Элысь, Пермь, Киров улосвылъёсысь 300 пала куноос пырисько: тодосчиос, удмурт азьветлӥсьёс, дышетӥсьёс но дышетскисьёс, шаерчиос но гожъясьёс. Пӧлазы вань Трокай Борисовлэн, Иосиф Наговицынлэн но удмуртъёслэн нырысетӥ ӧтчамазы вуылэмъёслэн ӵыжы-выжыоссы. Кун кенешлэн делегациеныз кивалтэ Алексей Прасолов.

Ӵапак Елабугаын 1918-тӥ арын 26-тӥ-28-тӥ инвожое удмуртъёслэн нырысетӥез Росси съездзы ортчиз. Отчы 9 уездъёсысь 78 делегат пыриськиз. Соос удмурт автономия кылдытыны ӵектонэн потӥзы. Кык ар ортчыса, Вотской автономной область кылдыдэм сярысь Декрет гожтэмын вал. 4-тӥ шуркынмонэ табере Удмурт элькунлэсь кунлык басьтэм нуналзэ пусйиськомы.

Конференция ортче со юртын, кытын радъяськиз удмуртъёслэн нырысетӥ ӧтчамзы. Татын али Казаньысь университетлэн Елабугаысь институтэз интыяськемын.

Туннэ конференциын удмурт югдытӥсьёс сярысь выль эскеронъёсын тодмато, озьы ик вераськон мынэ удмурт калыклэсь история но лулчеберет ласянь кылёсбурзэ утён но азинтон сярысь.

Ужало 6 секциос: “Егит тодосчи”, “Шудком”, ” Нылпи садъёсын но семьяосын уж”, “Кыл но дышетон”, ” Культура но туризм” но “Кивалтон. Мерлык. Ӵектосъёс”.

Конференцие пыриськисьёсты ӟечкыласа но азинлыко уж сӥзьыса, гожтэт ыстӥз Россиысь финн-угор калыкъёслэн ассоциацизылэн кивалтӥсез Пёр Тултаев.

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий