Эктӥзы перепечъёс!

Мылысь-кыдысь дэбесъёс басьтӥськизы улоскуспо фестивалез ортчытон борды. Тыршемзы юнме ӧз луы: куноос но, асьсэос но пачылась мылкыд басьтӥзы — кемалы тодазы кылёз. Кыӵе чебер эктӥзы перепечъёс! 90 кузя соос флеш-мобе потӥзы. Озьы соос усьтӥзы фестивалез. Соос борды итӥськизы ёросысь но, палэнысь но лыктэм кырӟась-верась коллективъёс. Калыкез бордазы кыскизы уно площадкаос.

— Милям ёросамы кемаласен ни ог-огенызы эшъяськыса уло пӧртэм выжыысь калыкъёс, — вераз культурая но туризмъя «Сибирь тракт» центрлэн кивалтӥсез Эльвина Будина. — Соин ик та фестивалямы но удмуртъёс гинэ ас кожазы ӧз кариське. Ваньмы уртче шулдыръяським. Кылсярысь, ужаз «Бускельёс» площадкамы. Отчы ёросамы улӥсь удмуртъёс, ӟучъёс, бигеръёс, армянъёс, азербайджанъёс но мукетъёсыз ас калык дӥсенызы пӧрмыса лыктылӥзы. Котькудзы калык сиёнъёссэс пӧразы. Удмуртъёс гур азьын пыжизы перепеч, табань — ваньзэ сое радъязы «Удмурт Кенеш» но «Шунды» огазеяськонъёслэн ёросысь ёзъёссы.

Удмурт сям-йылолъёсын, культураен тунсыкъяськисьёслы тунсыко потӥз мукетыз но площадка — «Выль кенлэн азбарез». Отчы озьы ик пыриськыны быгатӥзы вань мылкыд карисьёс — выль кенъёс. «Льӧмпу сяськаос» фольклоръя коллектив соос понна радъяз сюан ортчем бере кыкетӥ нуналаз ортчытӥськись сям-йылолэз. Озьы выль кенъёс удмурт дэрем дӥсязы, пӧсь гур азьын табань пыжизы, утялтӥськизы-ӵужиськизы…

Шулдыръяськонъёс бер ӝытозь кыстӥськизы. Чебер концерт радъяськиз на, отын но ог-огенызы пӧлэсьтӥськыса сямен чузъяськизы удмурт, ӟуч, бигер но мукет кылын кырӟанъёс. Быдэстӥзы соосты элькунысьтымы тодмо артистъёс но, али гинэ кутскисьёсыз но. Ужрадэз радъясьёс шуо: туж трос волонтёръёс ужазы та нуналэ — юрттэтсэс ӵектыса, асьсэос вазиськизы.

https://udmdunne.ru/ материалэзъя.