Эграысь шаертодонъя музейлэн ӵектосэз Росси вожвылъяськонлэн полуфиналаз потӥз
Музейлэн ӵектосэз Сибыр тракт вылысь Бачкей гуртысь «Этапный пункт» музеез выльдонэн герӟаськемын.
«Экспозицилы 17 ар ни, милям сое туала куронъёсъя кызьы ке но выльдэммы потэ — ивортодэтъя кыӵе выль технологиосты кутыны, туала экспозиция кылдытыны. Со понна ик кылдытӥмы ӵектосмес», — вераз шаертодонъя музейлэн кивалтӥсез Светлана Дмитриева.
Этапной пунктлэн юртэз 1837 арын пуктэмын, со Сибыре мынӥсь арестантъёслэн кӧлон интызы вал. 1900-тӥ арын отын земской училище усьтӥзы, собере (1999-тӥ арозь) школа интыяськиз. 2000-тӥ арын куартолэзе вашкала юртын «Этапный пункт» музей кылдытӥзы. Отын возьматэмын, кызьы улӥзы отын ссылкае келямъёс.
Табере конкурслэн полуфиналаз потэм ӵектосъёсты кылдытӥсьёс понна дышетонъёс радъялозы. Приволжск федерал округысь пыриськисьёсты инвожое Тольяттие люкалозы.
«Ӧтёнэн гожтэт милемлы вуиз ни. Семинарын ӵектосъёсты конкурслэн кыкетӥ люкетэзлы дасяны юрттозы. Мыным веразы, со 7–9 инвожое луоз шуыса», — ватсаз Дмитриева.
Вожвылъяськон 2017-тӥ арын 14-тӥ южтолэзьысен 17-тӥ пӧсьтолэзёзь ортчытӥське. Нырысетӥ люкетаз быдэс кунысь 1 сюрс 11 ӵектосъёс вуизы, полуфиналэ 182-эз шедизы.
Конкурсын вормисьёс 17-тӥ пӧсьтолэзе ялэмын луозы. Финалистъёслэсь ӵектосъёссэс быдэстон 2017-тӥ арысь 1-тӥ гудырикошконысен 2018-тӥ арысь 31-тӥ пӧсьтолэзёзь ортчоз.
Ватсалом, Эграысь шаертодонъя музейлэн сяна, вожвылъяськонлэн полуфиналаз шедизы Эгра ёросысь Бачкей гуртысь лулчеберетъя юртлэн «Чайный дом в деревне Бачкеево на Сибирском тракте» ӵектосэз но Сеп гуртысь лулчеберетъя юртлэн «Живая земля/Луло сюй» ӵектосэз.
Со сяна, кызьы ивортэмын «Культурная мозаика малых городов и сёл» ӵектослэн сайтаз, вожвылъяськонлэн кыкетӥ люкетаз потӥзы Лудорвайысь «Забытая полезность. Музейный ландшафт как туристический ресурс региона», Кезысь «Дорогой Мессершмидта» но Дэриысь «Массовое мероприятие как фактор развития внутреннего туризма «IX Международный фестиваль творчества им. Д. К. Зеленина «Окно в небо» ӵектосъёс.
Тодэ вайытом, 2016-тӥ арын «Культурная мозаика малых городов и сёл» Росси конкурслэн вормисьёсыз пӧлы шедизы Глаз ёрослэн «Улэп куаралэн храменз» но «ДондыДор» ӵектосъёсыз.