Эграысь егитъёсты «Этнопритяжение» фестиваль огазеялоз
27-тӥ гудырикошконэ Эграысь этно-паркын 3-тӥзэ ортчоз «Этнопритяжение» фестиваль. Арлы быдэ со огазея пӧртэм калыкъёслэн лулчеберетъёсынызы тунсыкъяськись егитъёсты.
Таяз радэ фестивальлэсь бадӟым люкетсэ басьтоз егит семьяослэн «Этнопикник» вожвылъяськонзы. Егит кузпалъёс но нылпиоссы асьсэос сярысь сцена влысен мадёзы: кыӵе сям-йылолъёсты чаклало, шулдыръяськонъёсты пусъё, кызьы семья шудзэс утё. Со сяна кырӟалозы, эктозы, кылбур лыдӟозы. Нош вань быгатонлыкъёссэс соос возьматозы, квест ортчыса.
Эграысь Эшъяськон юрт вӧзысь остановка выльдӥськоз фестивальлэн «Ӟезьы Арт» люкетэз улсын. Сое чеберъяны мылкыд карисьёс азьлапал куриськонъёссэс келязы, эскизъёс суредазы, кыӵеен вуоно остановкаез адӟо. Фестивальын солэн борддоръёсаз калыкъёслэн эшъяськонзылы сӥзем граффити кылдоз.
Шулдыръяськон дыръя пӧртэм мастер-классъёс ужалозы, дизайнеръёс выль дӥськут коллекциосынызы дефилеос возьматозы.
Нош ӝытазе люкаськем калыклы концерт пуктозы Татарстанысь Бавлы ёросысь удмурт кырӟась Shoner Paul (Павел Александров) но Удмуртиын улӥсь армянъёслэн «Урарту» огазеяськонзы.