Эграын казак кырӟанъя «Вольница» элькун фестиваль-конкурс ортчоз

Фестивале пыриськозы кызьы нимаз кырӟан быдэстӥсьёс, озьы ик творческой коллективъёс.  Ужрадэ пыриськисьёслэн арлыдзы  — 18 аресысен.

Конкурслэн куронъёсызъя, солистъёс но коллективъёс быдэн 1 кырӟан быдэстыны кулэ. Номерзы крезьгур инструментэн яке фонограммаен мыныны быгатоз.

Фестивальлэн йылпумъянъёсызъя, I, II, III степенё Лауреатъёсты но I, II, III степенё Дипломантъёсты пусъёзы.

Фестивальлэн программаяз концерт гинэ пыртэмын ӧвӧл. Ужрадэ лыктэмъёс казак калык сиён-юонэз веръяны, «Казачий круг атаманов» адӟытонэз учкыны,  «Сила казачья» нимо йӧскалык шудонъёсы пыриськыны быгатозы.

Озьы ик ортчозы кылбуръёсты, выжыкылъёсты, казакъёслэн улэм-вылэмзы сярысь произведениосысь люкетъёсты лыдӟонъя «Хуторские чтения» ужрадэ.