Эгра ёросысь «Удмурт Кенеш» огазеяськонлэн ёзэтэзлэн паськытатэм кенешонэз ортчиз

Солэн ужаз пыриськизы гуртоос, ёрос администрациын ужасьёс, Е.И. Горбачёва, «Эгра ёрос» муниципал кылдытэтлэн Тӧроезлэн воштӥсез, А.В. Поздеев, ёросысь депутатъёслэн Кенешсылэн кивалтӥсез но мукетъёсыз. Кенешез нуиз Т.К. Мосова, ёрос ёзэтлэн кивалтӥсез

Валтӥсез вераськон герзаськемын вал йылпумъянъёсъя но быръёнъя конференциез ортчытонэн. Час куспын трос мукет юанъёс но ӝутэмын. Котькудӥзъя решение кутэмын.
Дуннеын коронавирус висён вӧлмемен конференциез 15-тӥ шуркынмон бере ортчытыны чакламын. Гурт поселениослэн кивалтӥсьёссылы матысь дыре вазиськемын луоз: удмуртлыкез азинтон сярысь сюлмаськись гуртооссы сярысь огазеяськонэ ивортоно.

Кенешысен Кедра Митрей нимо ёрос премиез сётыны дэмлам кандидатураосты учкемын. Котькудзы лулысь-сюлмысь тыршо. Ӵектэмъёс пӧлысь одӥгзэ бырйыны капчи ӧй вал. Лауреатлэн нимыз шараямын луоз йылпумъянъёсъя но быръёнъя конференция дыръя.