Эгра каргуртын удмурт кылэз яратӥсьёслэн клубзы кылдӥз

Вера удмурт кылъя курсъёсты нуись, Эгра ёросысь Кедра Митрей нимо лыдӟетъюртысь шаертодон ужъя ёзэтысь валтӥсь библиотекарь Ольга Степанова: «Курсъёсы ветлэм муртъёслэн верамзыя, кылэз дышетон понна куинь толэзь туж ӧжыт. Соин ик клубе ветлыны, тодон-валанъёссэс муромытыны, удмурт лулчеберетэн матэгес тодматскыны мылкыд каризы».

Клубзылэн нырысетӥ пумиськонзы 9-тӥ толшоре ортчиз ни. Отын клублэсь активзэ юнматӥзы, ужанрадлык кылдытӥзы.

«Котькуд пумиськон азьын книгаен тодматон луоз. Тани 25-тӥ толшоре милям луоз кыкетӥ пумиськонмы. Со луоз удмурт эктонъя ӝыт. Нырысь ик ми возьматом книгаосмес, кыӵе милям библиотекаын фондамы вань книгаос удмурт эктонъя. Собере ортчытом соосын мастер-класс, дышетом удмурт эктонъёсты», — вера Ольга Степанова.

Котькуд пумиськон кыӵе ке ӧрлы сӥземын луоз. Занятиос тунсыко но, пайдалыко но мед луозы шуыса, соосты ортчытозы юри ӧтем ӧнерчиос. Кылсярысь, эктон ӝытэз нуоз Сеп гуртысь лулчеберетъя юртлэн кивалтӥсез Татьяна Мосова.

Ольга Степановалэн кылъёсызъя, Эграын курсъёс нырысьсэ ортчизы шуыны уг луы, но вискыз туж бадӟым вал. Удмурт кылэз дышетыны нырысь ик 23 адями гожтӥськиз, тужгес егитэзлы 24 арес вал, тужгес арлыдоезлы — 78. Но пӧртэм мугъёсъя ваньмыз ветлыны ӧз быгатэ. Курсъёсты 16 адями йылпумъяз, со пӧлысь тямысэз чылкак ӟучьёс. Вал администрациын ужасьёс но.

«Удмурт калык пӧлы потаса, отын соос муртэсь луо. Нош соос лыктэмын удмурт калыклы, гуртысь калыклы валэктыны маке, нош соосты мурт адями шуыса, кылэм-адӟем уг каро. Соин ик соослэн калык борды матынгес луэмзы потэмен, соос лыктэмын вал та курсъёсы», — администрациын ужасьёслэн удмурт кылэз дышетыны мылкыдъёссы сярысь вераз курсъёсты нуись.

Ольга Степановлэн верамезъя, 6 адями гожтӥськиз ни вуонояз курсъёсы.