Егитъёслэн трос йӧслыко «Вместе» центрзылэн дышетон сессиез усьтӥськиз Ижкарын 

    Егитъёслэн трос йӧслыко «вместе» центрзылэн дышетон сессиез усьтӥськиз ижкарын  1

    «Мар со «общероссийская гражданская идентичность»? Марлэсь со кылдэ? Со кылдэмын ке, кызьы сое валано. Ӧвӧл ке — кызьы сое кылдытоно? Кыӵе гуманитарной, мерлыко технологиос, ӵектосъёс ужало со югдурын? Ми понна со юан, соин ик ми малпамы, та ужпумъя одӥг улосвылын гинэ малпаськонлэн пайдалыкез уз луы шуыса. Асьмеос «общероссийской гражданской идентичность» сярысь вераськиськомы ке, быдэс Россиен ик со сярысь малпаськыны кулэ», — вераз сессиез усьтонын Удмуртиысь йӧскалык политикая министрлэсь ужзэ быдэсъясь Лариса Буранова.

    Удмуртилэн шоркараз Москваысь, Татарстанысь, Башкортостанысь, Марий Элысь, Комиысь, Пермь шаерысь, Пенза, Свердловск, Новосибирск улосвылъёсысь но Ямало-Ненец автоном округысь йӧскалык огазеяськонъёслэн ыстэм муртъёссы вуизы. Тодэ вайытом, «Вместе» центрлэн нырысетӥ сессиез Ижкарын кылем арын 17–18 шуркынмонэ ортчиз . «Молодёжная ассамблея единый Кавказ» мер огазеяськонлэн медиа-директорез Арсен Кайгермазов верамъя, соку умой команда кылдӥз, солы тунсыко вал ужаны.

    «Нырысетӥ ползэ мон татысь туж ӝутскем мылкыдын кошки, малы ке шуоно тӥляд татын йӧскалык ужпумъёсты радъян бордын ужась туж умой командады. Кыкетӥез, тӥ туж тунсыко но яркыт адямиосты люкады. Вал мыло-кыдо, ӝуась егитъёс, кудъёсызлы зэмзэ но тунсыко вал, соос кулэлыксэ валало. Азьланяз ваньмыз та ӧръя ӧз ке но мынэ, мер ужъя, соос инъет луись тодон-валанъёс басьтӥзы, соосты азьветлӥсьёс сямен вӧлмытозы, со туж кулэ», — пусйиз Кайгермазов.

    Сессие люкаськемъёс пӧртэм выжы калыкъёслэн кусыпъёссылы, экстремизмен нюръяськонлы, ӵектосъёсын кивалтонлы сӥзем лекциосты кылзозы. Мастер-классъёсы, кенешонъёсы, йӧскалык огазеяськонъёслэсь Россиысь пӧртэм калыкъёс пӧлын граждан индентичностез кылдытонлы сӥзем мер кичӧлтонъёссэс вӧлмытонъя занятиосы пыриськозы.

    http://udmurt.media/udm/news/obshchestvo/19375/