Егитъёслэн этнокультуразылы сӥзем «Тангыра» фестиваль 4-тӥзэ ортчиз
Кӧня ке арзэ ини «Тангыра» фестиваль Удмуртиын улӥсьёсты тодматэ пӧртэм калыкъёслэн крезьгуро дуннеенызы. Толсур кутсконэ егитъёслэн этнокультуразылы сӥзем шулдыръяськон 4-тӥзэ ортчиз. Но таяз радэ, крезьгурлы сяна, со модалы но, кинолы но сӥземын вал.
2-тӥ толсуре Ижысь Эшъяськон юртын дӥськут коллекциоссэс возьматӥзы Удмуртиысь но Марий Элысь дизайнеръёс. Йошкар-Олаысь Евгения Кошкина поръёслэн пужыосынызы керттэм кофтаосты возьматӥз, Ижысь Дарали Лели учкисьёс понна чуваш калык дэремъёсты дасям, соосты басма юдэсъёслэсь вурем чеберъяськонъёсын йӧспӧртэм карем. Алевтина Семёнова нырысетӥ коллекцизэ айшетлы сӥзем, сое, пе, туала вакытэ но, огшоры дӥськутэз сямен, нуллыны луэ. Удмурт дӥськут али но туала луыны быгатэ шуыса, возьматӥз Можгаысь дизайнер Надежда Сапожникова но. Со, удмурт дэремлэн тусыз вылэ пыкъяськыса, уже ветлон костюмъёс вурем.
Паймытӥзы Надежда Николаева дизайнерлэн бурд улаз кыдам нылпиос: покчи модельерлэн школаяз дышетскись нылашъёс асьсэос дэремъёссэс малпазы но, вуризы но.
Шаерысьтымы фольклорез утись коллективъёслы сцена вылэ потон понна нимаз дӥськут вурыло, сое куддыр музейысь экспонатъёсын ӵошатыны луэ. Кылсярысь, Ижысь ӟуч культураез утись «Ленок» но «Родолад» ансамбльёс кырӟало но экто дэремъёсын, кудъёссэ 19-тӥ-20-тӥ дауръёсы Дэбес, Сарапул но Балезино палан улэм ӟучъёс нуллӥзы. Нош бигеръёслэн «Асылъяр» ансамбльысьтызы пиналъёслэн оглом 100-лэсь трос костюмъёссы люкаськемын ни, пе.
«Тангыралэн» тужгес бадӟым но яркыт люкетэз — анай кылын кырӟась группаослэн концертсы.
Удмуртие вуизы Чувашиысь «ЯлАр», Мордовиысь «Морденс», Комиысь «ПопКорн» но «Войвыв ру», Татарстанысь «Кайнар» группаос.
Таяз радэ сцена вылэ Удмуртиысь но уно группаос потазы: Эграысь «КузмиЧ», Ижкарысь «Анрил», Дэри ёросысь Шор Постолысь «Гаруда» калык понна гуръёссэс кисьтӥзы.
Концертлэн бадӟым люкетэз «боболенин» группалы висъямын вал. «Тангыра» фестивальын со 3-тӥзэ шудӥз ни. Котькуд ар пиос шедьто маин паймытыны. Таяз радэ но калыклы 2 выль кырӟанзэс возьматӥзы, азьлоосызлэсь соос шӧдскымон висъясько: азьло группалэн азьветлӥсезлэн Кирилл Кирилловлэн гранж жанръем кырӟанъёсыз пӧрмо вал, нош али крезьгураз кылдӥз металлэн но поп-роклэн шӧмыз. Со сяна, пиос «Малы ми» группалэсь но творчествозэ тодазы вайизы, угось «боболенин» группаын шудӥсьёс пӧлысь ӝыныез «Малы ми» группаын шудэмын. «Обысай» кырӟанзэс быдэстон понна Богдан Анфиногеновез но ӧтизы. Учкисьёслы но оскон сётӥзы кадь, оло, «Малы ми» нош бичаськоз но концертъёсыныз удмурт калыкез паймытъялоз шуыса.
Нырысьсэ «Тангыралэн» сцена вылаз потӥз Москваысь «Калевала» группа. Россиысь фолк-метал жанрен шудӥсь группаос пӧлысь со адӟем карымонэз луэ, арлы быдэ кунмес концертъёсыныз котыръя. Туэ группалы 15 ар тырмиз ни!
Фестивальлэн берпуметӥ люкетэз эшшо тросгес калыкез котыраз люказ. 3 нунал ӵоже Ижысь «Империя Грёз» кинотеатрын учкыны луиз Россиын улӥсь калыкъёслэн кылъёсынызы лэсьтэм киноосты. Нуналысь нуналэ соосты дунъяны калык гижыр! гинэ лыктылӥз.
Фильмъёсты фестиваль понна бырйиз Ижысь киноклублэн кивалтӥсез Андрей Смирнов.
Фестивальын удмурт кылын 1 кино гинэ возьматэмын вал — Мария Чернавиналэн туэ потэм «Кыз» ужез. Учкисьёс пусйизы, удмурт кино туж шер кылдылэ шуыса. Фестивалез радъясьёслэн, Эшъяськон юртлэн но «Шунды» огазеяськонлэн оскемзы потэ, та выллем ужрадъёс асьме режиссёръёсмес но, актёръёсмес но бурдъялозы шуыса.
