Егит удмурт кырӟасьёслэн куать крезьгуро клипъёссы потозы Удмуртиын

    Та дырлы ньыль клип дась ни: PEACE PU группалэн, Анна Образцовалэн, Эльвира Панченколэн (Chupai Eli), алигес Наталья Бурановалэн потӥз. Луоз на Ксения Ахметхановалэн но Лади Свети проектлэн (Светлана Ручкина). 
    «Валамон, уж мынӥз егитъёсынгес, нош учкыны сое быгатозы вань мылкыд карисьёс, али вань сыӵе луонлык. Вераны кулэ, ми эскеримы, соос пӧртэм жанрен мед луозы шуыса, огвыллемесь ӧвӧл. Пӧртэм манерен кырӟасьёс, пӧртэм крезьгурез, кыӵе ке зыл-зыл но, джаз манерен но, рок но. Возьматэммы потэ вал со пӧртэмлыкез но трос луэмзэ. Съёмкаосты радъянэн выриз, кинэн ужаны бырйиз «Шунды» огазеяськон. Сценарийзэс соглаштыны милемлы ыстылӥзы, кӧня ке ӵектонъёс сётӥмы, но 90 процентэз — со асьсэлэн ужзы. Клипъёс лэсьтӥсько интернетын, мерлыко вотэсъёсын вӧлмытон понна», — вераз йӧскалык политикая министерствоысь валтӥсь ӧнерчи Елизавета Ложкина. 

    Та уж быдэстэмын Удмурт элькунлэн «2013–2020 аръёсы пӧртэм выжы калыкъёслэсь кусыпъёссэс азинтон но радъян» кун программаезлэн «Удмуртиысь калыкъёслэсь кылъёссэс утён но азинтон» люкетэз улсын.

    Кызьы вераз иворъёсъя «Удмуртия» агентстволэн корреспондентэзлы удмурт егитъёслэн «Шунды» огазеяськонзылэн кивалтӥсез Ольга Тронина верамъя, крезьгур, видео — со кылэз вӧлмытон понна одӥгез тужгес устоез амал. Сое шӧдыны, кылзыны, учкыны быгатэ котькуд адями, солэн котькыӵе йӧслыкез мед луоз. Озьы ик та ӵектос удмурт клипъёсын вырисьёсты но азинтыны юрттэ. 
    «Котькудӥз (клип -ред.) бордын ужаз нимысьтыз группа. Пӧртэм сямен луиз, кинлэн кызьы. Кин ке ачиз дэмлаз, кинлы ке «Шунды» утчаз. Гудырикошконлэн пумаз вань клипъёс дась луозы. Кырӟасьёсты быръёнын одӥг курон вал — соослэн та нырысетӥ клипсы мед луоз», — вераз Ольга Тронина. 
    Клипъёсты лэсьтыны 200 сюрс манет висъямын вал. Солэсь олгюкетсэ, Россиысь калыкъёслэсь кусыпъёссэс юнматон, но йӧскалык лулчеберетсэс азинтонъя программа улсын, сётӥз федерал коньдэт.