Егит кузпалъёслы мастер-классъёс, кубыз-бар но сьӧре кутыны сиён: Ижкарын Чеберлыко киужъёсъя центрын гастростудия усьтӥське

    Егит кузпалъёслы мастер-классъёс, кубыз-бар но сьӧре кутыны сиён: ижкарын чеберлыко киужъёсъя центрын гастростудия усьтӥське 1

    Гастростудия кыклы люкиськоз: тематической висъетлы но чай юон интылы.

    Гастростудимы вылтусызъя аспӧртэм Кубыз-бар выллем луоз, вашкала крезьгуро омыр, йылолъёсты утён. Пуштроссэ вылтусыз усьтоз.

    Выль вӧлмет туристъёслы но, татын улӥсьёслы но тунсыко луыны быгатоз. Гастростудиын нимаз адямиослы но группаослы мастер-классъёс, озьы ик ужась коллективъёслэн но семьяослэн вожвылъяськонъёссы ортчылозы, кытын паськыт вӧлмымтэ йӧскалык сиёнъёсты пӧраны луоз. Озьы ик котькуд нуналлы чаклам программа дасяло. Со кыӵе ке темая пумиськонъёс но егит кузпалъёс понна дышетонъёс.

    «Егит кузё кышноез ческыт пӧраны дышетомы, нош корка кузёез тӥрлыкъёсын ужаны, кортӵог шуккыны», — шуэ Юлия Железняк, Удмуртиысь Чеберлыко киужъёсъя центрлэн кивалтӥсез.

    Чакланъёсъя, туристъёсты кубызэн но шуланэн шудӥсьёс, йӧскалык дӥськутэн кузё кышноос пумиталозы, нош Центрын ужасьёс Удмуртилэн историеныз но йылолъёсынызы тодматозы.

    Азьланяз гастростудиын сиён заказтыны луоз.

    «Азьланяз нуназеяны мылкыд карисьёс понна ужаны кутскомы, озьы ик ужан интыязы нуназеясьёс понна ӵектонъёс дасяськомы ни – соос татысь сиён заказтыны быгатозы. Ми тунсыко акциос дасяськомы, оскисько, соос калыклы кельшозы», — шуэ Юлия Железняк.

    Юлия Железняк верамъя, матысь дыре ини сӥзьыллы ужрадъёсын ялон кылдоз. Выль вӧлметын али ини сиён-юонъя этно-ёлкаос но ужась коллективъёслы ӝытъёс ортчытонлы дасясько.

    https://udmurt.media/udm/news/kultura-i-turizm/40453/