«ДондыДор» йӧскалыккуспо дышетскон форум ортчоз

10-тӥ шуркынмонэ «Глаз ёрос» муниципал кылдытэтлэн администрацияз «Вашкалаысьтыз туннэ нуналэ: мынам покчи Шаере» конференци ортчоз.

Отын «Глазовская земля (Земля Донды) — легендарная родина удмуртского народа» веранлэсь зэмлыксэ чакланы, лулчеберетлы но дуннеез котыръянлы сӥзем ӵектосъёсты эскерыны, пӧртэм выжыысь егитъёслэсь ӟеч кусыпъёссэс кылдытон понна выль ӧръёсъя кенешыны малпало. Тодосъя но эскеронъёсъя вань ужъёсты йылпумъясь бичетэ пыртозы.

Конференцие пыриськозы шаертодосчиос, историкъёс, археологъёс, лингвистъёс, архивъёсын, музейёсын ужасьёс, лыдӟетъюртъёсысь ӧнерчиос, школаосысь но вылӥ тодон-валан сётон ужъюртъёсысь дышетӥсьёс но дышетскисьёс.

11-тӥ шуркынмонэ Глаз ёросысь нылпиослы спортъя школаын «Донды объединяет — межнациональный диалог» котырес ӝӧк ортчоз. Глазкарысь Эшъяськон юртысь ӧнерчиос лулчеберетъя но спортъя йӧскалыккуспо ужрадъёслэн аспӧртэмлыкенызы тодматозы. Со сяна, конференцие пыриськисьёсты стратегияя сессия возьма на. Со улсын «Культурная мозаика: партнёрская сеть» Росси конкурсын вормисе потэм «Лулчеберетъя, но туризмъя «ДондыДор» парк» ӵектосэн тодматон ортчоз. Стратегияя сессилэн валтӥсь ужпумез — Глаз ёросэз удмурт калыклэсь шаерзэ сямен азинтон стратегиез кылдытон.

12-тӥ шуркынмонэ нылпиослы спортъя школаын ик «Сила в единстве!» спортъя йӧскалыккуспо шудон ортчоз. Со улсын шаермылэн уйпал ёросъёсаз улӥсьёслэн сяме пырем калык шудонъёссы ортчозы. Отчы Удмуртилэн уйпал ёросъёсысьтыз ужась егитъёслэн (Глаз, Балезино, Юкаменск, Красногорск, Эгра, Кез, Яр ёросъёсысь но Глазкарысь) командаоссы пыриськозы.