Дизайнеръёсты ӧтчаз Пурга музъем
Таяз шутэтскон нуналъёсы Пичи Пургае шаерысьтымы дизайнеръёс люкаськизы. Татын «Учке мынэсьтым дэремме» фестиваль радъяськиз.
Ужрадэз усьтӥз кылосбур наукаосъя доктор, профессор Татьяна Григорьевна Владыкина, со мадиз, кыӵе инты бысьтэ адями но солэн дӥськутэз удмурт фольклорын. Нунал ӵоже куноос калык дӥськутъёсын но соослэн пуштросэнызы тодматскизы.
Со сяна фестиваль дыръя пӧртэм киужъёсын вырыны луиз. Галина Матвеева но Владимир Ботников дышетӥзы уксётӥрлык лэсьтыны, Дарали Лели – ляпочиха амалэн монисто вурыны. Татьяна Москвиналэн бурд улаз мылкыд карисьёс пурга дэрем вуризы.
«Учке мынэсьтым дэремме» фестивалез йылпумъяз гала-концерт, отын пусйизы тужгес но усто дизайнеръёсты но соослэсь коллекциоссэс. «Этномотивы» номинациын вормиз Светлана Ваховская. «Реконструкция» номинациын – Валентина Фаресова, «Аксессуары с элементами народного творчества» номинациын – Галина Матвеева, «Лучшая презентация» номинациын – Забида Башарова.