Дэриысь музейын ужасьёс «Быронтэм полк» адӟытон дасяло

Стелла вылэ интыялозы фронтовикъёс, ож мышкын ужам, ож нылпиос, концлагерьёс пыр потэмъёс сярысь ивортонъёсты. Быдӟым ожен герӟаськем историос ёросын ӧжыт ӧвӧл. Верано ке Шурдымка гуртысь Павел Калабин сярысь, со 150 сюрс манетсэ самолёт лэсьтыны сётӥз. Собере ож дыръя Павел Калабин нимо самолётэн лобаз Совето Союзысь Герой Александр Кочетов.

«Быронтэм полк» адӟытон улсын Дэри ёросын улисьёс асьсэлэсь историоссэс но вайыны быгато, кызьы кариз Римма Миронова. Со кагаз вылэ анаезлэн ож вакытэ улэмез но тыршемез сярысь гожтэ: «Уй-нунал ужазы, иземзэс ӧй ик адӟылы».

«Нюлэс дасяно вал ук — армилы но, заводлы но эстӥськон кулэ. Нюлэскын ужало толбыт, нош гужемзэ — гуртын. Мон мамаме кабзэ уг тодӥськы. 1-тӥ классын гинэ «мама» шуыны кутски. Но со мыным матысь адями, анай шуыса шӧдӥсько вал. Бертэмзэ укноетӥ адӟисько ке вал — учкелэ Педосьты бертэ ини, шуисько вал», — вера Римма Миронова.

Аслэсьтыз тодэ ваёнъёссэ Римма Тимофеевна стендэ юнматыса кельтӥз. 9-тӥ куартолэзёзь, музейын ужасьёслэн чакламъёссыя, та борддор быдэсыз туспуктэмъёсын, гожтэмъёсын тырмытэмын луоз.

http://www.myudm.ru/