Дэри ёросысь егитъёслэн «Шундыберган» шудоназы пыриськизы арлыдоос но

Визь сынанъя «Шундыберган» шудон туэ кык люкетэн радъяськиз. Нырысетӥзэ нылпиос гуртазы быдэстӥзы.

Вера Дэри школаысь удмурт кылъя дышетӥсь Ангелина Байсарова:
«Интыосын конкурс ортчытӥмы суредъёсъя, кылбуръёсъя, сочинениосъя. Соос ваньзы сӥземын вал гуртлы, ёрослы, малы ке шуоно туэ арын милям ёросмылы 80 ар тырмоз, соин ик вань ужъёсмес сӥзимы та темалы».

Кыкетӥ люкетэз ортчиз сцена вылын. Литературной но крезьгуро композициос пыр нылпиос возьматӥзы Дэри музъем вылын улӥсъёслэн улонысьтызы яркыт учыръёссэс, адямиосты, кудъёсызлэн улонзы герӟаськемын ёросэн. Сценкаосы одно ик пыриськизы арлыдоос.

Казмас школаын дышетскисъёс Раиса Моторина сярысь возьматон дасязы. Казмас гуртын вордӥськем нылкышно ёросысь гурт удысъя управлениын валтӥсь бухгалтер луыса тыршиз, али ёросысь ветеранъёслэн «Мӧзмон» клубенызы кивалтэ.

«Тау саклыкды понна, — вазиськиз Раиса Моторина егитъёслы. – Яратэ, гажалэ анай кылдэс. Со анай кадь ик мусо но дуно. Яратэ улонэз, тырше лэсьтыны ӟеч ужъёс».

«Шундыберган» шудонэн нылпиослэн вордӥськем палъёсынызы но отын улӥсь калыкен тодматсконзы уз йылпумъяськы. Тулыспал толэзе 165 ар тырме Дэри школалы. Бадӟым юбилей улсын ёросысьтызы бадӟым адямиос сярысь тодон-валанъёсын шыкыссы эшшо но узырмоз.