Дэбесын «Зарни-Ё перепеч» фестивале 3 сюрс 500 мында адями пыриськиз

Фестиваль калыккуспо инлыкен ортче. Туэ Пермь улосысь, Башкириысь, Киров улосысь делегациос пыриськизы.

Пӧраськонъя площадкаын люкаськемъёс веръяны быгатӥзы вашкала сямен пӧрам перепечен, табанен но пельнянен. Нимысьтыз саклык  перепечлы. Шулдыръяськонын та сиёнэз пӧртэм пумо пушкесъёсын пӧыжизы – сӥлен, кубистаен, губиен, чорыген, кешырен, картофкаен, пешникен, сяртчыен. Озьы люкаськемъёс веръяны быгатӥзы мукет выжы калыкъёслэсь сиёнъёссэс но – бигер перемячез, карел калиткаез, латыш скландраусисэз.

Праздникын  «Лучшее подворье-2018» конкурс но радъямын вал. Отын  14 азбаръёслэн кузёоссы удмурт сиён-юонэз возьматыны кулэ вал. Со сяна жюрилэн ёзчиосыз ӝӧк вылэз быгатыса дасямзэс, йӧскалык дӥськутэн луэмзэс дунъязы. Вормись луиз Шаркан ёросысь Зузя гуртысь лулчеберетъя юрт. Соос аръян, сюкась дасяллям, сяртчынянь пӧраллям.

Фестивальын асьсэ вуззэс возьматӥзы элькунысь фермер хозяйствоос, нош кибашлы юртъёс — асьсэ киужъёссэз. Со сяна Дэбесысь лулчеберетъя но туризмъя «Сибыр тракт» центр ёроссылэсь историзэ но географизэ, удмурт кухняез тодонъя квест ортчытӥз.

Фестиваль йылпумъяськиз концертэн. Сцена вылын шулдыртӥзы 15 коллективъёс но кырӟасьёс, соос пӧлын Алнаш ёросысь удмурт кырӟанъя «Вуюись» ансамбль, Шаркан ёросысь фольклоръя «Чебересь кенакъёс» коллектив, Кез ёросысь калык кырӟанъя «Пужмер» ансамбль.