Дэбесын йӧскалык лулчеберетъя фестиваль ортчиз

Фестивале кырӟанъя, эктонъя коллективъёс, нимаз кырӟасьёс, Дэбес ёросысь йӧскалык лулчеберетъя огазеяськонъёслэн ёзчиоссы пыриськизы. Удмурт  культураез возьматӥзы  «Ӟардон», «Воля», «Радужка» ансамбльёс но кырӟась  Роман Осотов.

«Рябинушка» ансамбльысь артистъёс ӟуч калык кырӟанъёсты быдэстӥзы.

Наталья Бушмакина но Анна Тронина украин калык культураез возьматӥзы, нош Владимир Карачев — старообрядецъёс лэсь кырӟан сям-йылолъёссэс.

Интыысь артистъёс сяна, сцена вылын номеръёссэс возьматӥзы Ижкарысь но Балезино ёросысь артистъёс. Озьы ик Пермь улосвылысь коллективъёс: крезьгур инструментъёсъя «Играй, гармонь» ансамбль, калык кырӟанъя «Русская душа» ансамбль, эктонъя «Созвездие» театр, но «Гранд Сеньоры» группа.

Дэбесысь лулчеберетъя центрлэн фойеаз калык культуралы сӥзем экспозиция ужаз. Отысь мылкыд карисьёс Дэбесысь кибашлыослэн арбериоссэс, калык костюмъёсты, Сибырь тракт ёрос музейысь туспуктэмъёсты учкыны быгатӥзы.