Дэбес ёросысь чеберлыко киужъёсъя юртысь ӧнерчиос «Мир без границ» ӵектосазы пыриськыны быгатӥсьёсын тодматско
Солэн кылъёсызъя, радъясьёс котькуд ӧлексы доры вуыса, сое Чеберлыко киужъёсъя юртэн, солэн ужан ӧръёсыныз тодмато. Пыриськисьёс нимысьтыз анкета гожъяло, кытын пусъё, марлы соослэн дышетскемзы потэ.
«Бадьпу ньӧрлэсь пунон, горд сюй, гын, пуэн уж, кызьпу туй – тужгес (быръё – ред.). Дышетскон ласянь тросэз гожто, ми соос доры мед поталом шуыса. Нырысь ик ми, валамон, поталом. Собере учком ни, оло, ми татчы соосты вайылом, оло, ялан асьмеос соос доры поталом», — шуэ Ольга Салтыкова, Дэбес ёросысь чеберлыко киужъёсъя юртысь ёзэтлэн кивалтӥсез.
Радъясь верамъя, пыриськисьёс та ӵектосэз шумпотыса пумитало, малы ке шуоно соин валче сӧсыръёс улонын пайдаё луыны быгато.
«Ми эшшо валэктӥськомы на, дорын ужась кибашлы луыны быгатӥськоды шуыса. Ми пыр собере киужъёстэс вузаны. Соос солы туж шумпото. Бадӟым мылкыдзы дышетскыны», — вера Ольга Салтыкова.
Тодэ вайытом, Татьяна Жуйковалэн «Мир без границ» ӵектосэз Егитъёслэн проектъёссыя огъяросси конкурсазы 100 сюрс манет грант утӥз. Проект кык ар кыстӥськоз но сӧсыръёсын кылдытэм киужъёсын адӟытон-вузкаронэн йылпумъяськоз.