Дэбес ёросын «Толсур пукон» ужрад ортчиз
Пумиськон улсын люкаськемъёс «Удмурт Кенеш» огазеяськонлэсь 30 ар тырмонзэ пусйизы, озьы ик Выль арез, Ымусьтонэз но Вуж Выль арез пумитазы.
Толсур пуконэ ӧтемын вал мукет йӧскалык огазеяськонъёслэн азьветлӥсьёссы но. Со сяна люкаськемъёсты ӟечкыланы вуылӥз ёрос администрацилэн аппаратэзлэн кивалтӥсез Светлана Хохрякова. Со кенешчиослы тау кариз удмурт лулчеберетэз азинтэмзы но вӧлмытэмзы понна.
Азьланяз выль вормонъёс сӥзиз ёзчиосызлы Дэбес ёросысь ёзэтлэн кивалтӥсез Ольга Шкляева. Со пусйиз, куке бордад люкасько вань эшъёсыд, со шумпотон но данъяськон шуыса.
«Ог-огмес валаса, одӥг бадӟым семья кадь улыса, бурдъёс ӝутско но азьланяз одно ик ужам потэ», — шуиз со.
Ивортон басьтэмын «Удмурт кенеш» огазеяськонлэн вотэсбамысьтыз