ДДН-ын «Ним сётонъя» перформанс возьматӥзы

«Пельняньлэн дунневыл нуналэз» улсын Эшъяськон юртын мастер-класс ортчытӥзы «Эмноюмно» группае пырисьёс, со — Кучыран Юри (Юрий Лобанов) но Жон-Жон Сандыр (Александр Пушин).

Нырысь-валысь соос люкаськемъёсты тодматӥзы нимъёссылэн кылдэменызы. Озьы Юрий Лобановлэн аслыз гинэ тупась нимыз – Кучыран. Со атаезлэн вордскем гуртаз кутӥськись нимыз. Нош Александр Пушинлэн – Жон-Жон – гырлылэсь куаразэ возьматӥсь кыл. Со солэн лулпуш дуннеезлы тупа.

Собере быдэстӥзы Юрий Лобановен гожтэм “Каллен олле” кырӟанзэс. Со кырӟанэз финн-угор этнофутуристъёслэн гимнзы, шуыны луоз.

Люкськемъёслы ним сётон азьын мастер-классэз нуисьёс котькудзэс выжызы сярысь вераны куризы. Озьы ик кыӵе луэмзы потэ — со сярысь малпанъёссэс юазы. Кылсярысь, одӥгез нылаш гожтӥз “быть свободной». Солы ним но пуксиз Эрико Софи. Эшшо таӵе нимъёс кылдӥзы: Ӧркеми Натӥ, Иншоро Мари, Шалган Вара но мукет.

Ватсан: «Эмноюмно» группа 2010-тӥ арын куартолэзе кылдэмын.