Ӵуказе Ижкарын Ижкарын улӥсьёсты но вуэм куноосты Быдӟым Вормонэз пусъён узыр программа возьма

10 часын Шор площадьын Вормонлэн парадэз кутскоз.  Отчы пыриськозы ожгар, эрикрадэз утён ёзъёсын ужасьёс, ожгар-патриот огазеяськонъёслэн ёзчиоссы, Ижкарысь ожгар предприятиосысь ӧнерчиос.  Парадэз радъясьёс верамъя, азьвыл аръёсы сярысь туэ  ужрад узыргес луоз техника ласянь. Отчы Удмуртиысь  обороная 6 предприятиос асьсэлэсь техниказэс возьматыны поттозы. Озьы ик возьматэмын луоз элькунысь Транспортъя но Гурт удысъя министерствоослэн, ДОСААФ-лэн техниказы. Котькуд ар сямен ик ретромашинаос ортчозы.  Парадэз меӵак эфирын учкыны луоз «Удмуртия» телеканал пыр.

10 час 30 минутэ «Вунонтэм полк» акцилы кутскон сётэмын луоз. Колонна люкаськоз Шор площадысь Элькунлэн данъян пулэз вӧзын. Акцие пыриськыны быгатэ котькуд мылкыд карись, чурытэсь кабъёс ӧвӧл. Отын ужалозы волонтёръёс. «Мынам Удмуртие» телеканал итӥське та ужрад борды но «Вормонлэн историез» нимо акци ялэ. «Вунонтэм полк» акцие вуэмъёс Быдӟым атыкай оже пыриськем ӵыжы-выжыоссы сярысь меӵак эфирын вераны быгатозы. Мылкыд карисьёслы вазиськоно «Вунонтэм полкез» радъясь  волонтёръёслы. Соосты тодманы луоз дӥсьсыя.

10 часысен ик Ижкарысь Наговицын урамын «Кибашлыослэн карзы» усьтӥськоз. Шаерысьтымы киужъёсъя центръёс но юртъёс асьсэ лэсьтэм ужъёссэс ярмаркае поттозы.

Кӧня ке ар ини Быдӟым Вормон нуналэз пусъён ваньмаз ик  площадкаосын чузъяське «Катюша» кырӟан. Туэ но сое кырӟалозы 13 часын. Котькуд ар сямен ик туэ  но ортчоз «Тупаса улонлы сизем эстафета». Отчы Ижкарысь дышетон ужъюртъёс пырисько. Таиз ужрад 12 часысен 15 часозь ортчоз. Спорт ӵошатсконъёс луозы Ижкарлэн Набережнояз но.

0 часысен  22 часозь пӧртэм площадкаосын элькунысьтымы  кырӟась-эктӥсь коллективъёс концертъёс сётозы. Нош Вормон нунал праздникез йылпумъялоз салют. Туэ со чакламын ог 7 минутозь.

http://www.myudm.ru/