Чипей пыж, зарни куас, Дондылэн пуконэз: 16 кабъёс лэсьтӥзы Глаз ёросын лэнд-артъя фестивальын

«Ми отын вал 30 ӵошен. Мастеръёсмы вал быдэс Удмуртиысь. Жуг-жаг бодыосты, кудзэ сутысалзы гинэ, ми уже кутӥмы. Сыӵе материаллэсь, ваньмыз паймо, сыӵе чебер маке лэсьтыны луэ. Маке быдӟа скульптураос отын: кык вынъёс Идна но Гурья — Донды батырлэн пиосыз, со сяна, «Трон Донды», «Айшон»… Туж тунсыкоесь объектъёсмы пӧрмизы», – вера Глаз ёросысь Лулчеберетъя но туризмъя центрысь туризмъя но чеберлыко киужъёсъя ёзэтысь ӧнерчи Елена Набокова.

Вань ужъёсты уйпал удмуртъёслэн легендаоссыя лэсьтыны кулэ вал бере, Адам гурт вӧзысь гурезь бамалын кылдӥзы Дондылэсь зарни куасъёсыз — батыр куасъёсын ворттылыны яратылӥз, Чипей пыжез — Донды соин Ватка палась вуиз. Озьы ик адӟыны луэ пӧйшурез, кудӥзлэсь нимзэ шара вераны уг яра вал. Елена Набоковалэн верамезъя, Яр, Глазов палъёс али, но койыкез «йыро» шуо. «Ӟучьёслы секытгес но, «юраша» шуо ни лосьмес».

«Егитъёс но, зӧкъёсызгес но калыкмы юн паймизы, кыӵе тунсыкоесь вылэм милям удмурт легендаосмы. Куке со легенда <…> борды луэ йӧтскыны, куке со книгаын гинэ гожтэмын ӧвӧл, со тани син азьпалад сылэ — марке быдӟа быдӟа скульптура, куинь метръем, тон валаськод: тон сыӵе пичи гинэ адями, нош кыӵе данэз милям удмурт калыкмылэн, кыӵе чебер выжыосыз удмуртъёслэн шуыса, легендаоссы», – шуэ Елена Набокова.

Фестивальлэн нырысетӥ нуналъёсаз жаль-жаль зориз, но кибашлыос одӥгзы но ӧз вералэ, соос жадизы, кынмизы шуыса, пусъе Елена Набокова. Кин ке ужзэ ӝоггес быдэстӥз ке, мукетызлы юрттӥськиз.

«Ми туж шумпотӥськом, милям фестивальмы пӧрмиз шуыса. Ӧтиськом ваньзэсты куное ми доры, адӟыны. Котькуд дыре отчы луэ вуыны, сюресмы но милям отын тупатэмын юн ӟеч. Просто ортчыны, шутэтскыны, пукыны», – шуэ Елена Набокова.

Елена Набокова оскемзэ вераз, та тунсыко кабъёсты нокин уз тӥя, соос трос аръёс ӵоже калыкез шумпоттозы на шуыса. Нош 25-тӥ гудырикошконэ та интыын ик вань удмуртъёслэн воршудъёссылэн элькун люкаськонзы ортчоз.

https://udmurt.media/udm/news/kultura-i-turizm/38083/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий