«Чибориё» фотомарафон ялӥз «Удмурт нылкышно кенеш» огазеяськон

    "чибориё" фотомарафон ялӥз "удмурт нылкышно кенеш" огазеяськон 1

    Россиын таиз ар калыклэн культурая наследиезлы, калык исскусстволы сӥземын. Соин валче «Удмурт нылкышно кенеш» вань кибашлы нылкышноосты, нылъёсты, песянайёсты ӧте «Чибориё» фотомарафонэ пыриськыны.

    Керттэм, пужъятэм, вурем, вӧлэм яке мукет амалъёсын пӧрмытэм киужъёсыныды туспуктэмъёстэс пуктоно асьтэ вотэсбамъёсады. Озьы ик тупалозы корка но бакча котыръёстэс шулдыр карон понна лэсьтылэм ужъёсты.

    «Вашкала дырысен котькуд семьяын нылкышноос куиськизы, керттӥськизы, чильпаськизы, вуриськизы, оглом вераса, киужен выризы. Ужъёссы чеберенызы, чибориё-чибориё луэменызы паймытъязы. Али но быгатӥсь нылкышноос киужлэсь уг ӵыдо – вашкала киужен вырон сяна, выль амалъёсын мыло-кыдо тодматско», — шуэ огазеяськонлэн кивалтӥсез Елена Миннигараева.

    Марафон куинь ӧръя радъяськоз: «Кибашлы песянай», «Кибашлы анай», «Кибашлы дыды». Соин ик отчы пӧртэм арлыдъем нылкышноос, нылъёс пыриськыны быгато.

    Мар кароно фотомарафонэ пыриськон понна:

    1. Быдэстэм киужъёстэс туспуктоно
    2. Асьтэ вотэс бамады туспуктэмъёстэс пуктоно  #Удмуртнылкышнокенеш #Чибориё #ЗарниФотомарафон хештегъёсын.

    Марафон кыстӥськоз 15 -тӥ гудырикошконозь. Тужгес усто кибашлыосты печатлалозы «Удмурт дунне» но «Ӟечбур!» газет бамъёсы.