«Чебеляй» студия Пензаысь вормонэн бертӥз
Калык эктонъёслы сӥзем «Танцуй, Поволжье!» фестиваль-конкурсын вормиз шаерысьтымы эктонъя «Чебеляй» студия.
23-тӥ-25-тӥ коньывуонэ Пензаын вормон понна 24 эктӥсь ансамбльёс вожвылъяськизы.
Кузебай Герд нимо йӧскалык гимназилэн бурд улаз ужась «Чебеляй» ансамбль аслаз номинацияяз лауреат луиз но конкурслэсь гран-призэ басьтӥз. Таиз ар понна та «Чебеляйлэн» 3-тӥ бадӟым вормонэз ини, талэсь азьло егитъёс Казаньын но Чебоксарыын ортчем ӵошатсконъёсын 1-тӥ интыосын бертылӥзы.
Тодады вайытомы, «Чебеляй» ансамбль 20 арлэсь кема улэ ни, шаерамы но, палэнын но адӟем карымон луэ.