Бурдъясь 3 буёл
Россилэсь флагзэ «Орёл» корабльын нырысьсэ ӝутэм дырысен 350 ар тырме. Нош нимаз праздникен та нуналэз пусйыны кутскимы 1994-тӥ арысен: Россилэн Президентэз В. Путин указ юнматэм бере.
3 буёло куншет туннэ ворекъя-пиштэ быдэс элькунамы. Пӧртэм интыосын ортчо «Триколор единства» нимаськись ужрадъёс. Егит пиос но нылъёс — волонтёръёс — ураме потыса, калыклы куншетлэн буёлъёсыныз лентаос кузьмало. Киосазы лентаосты, флагъёсты кутыса, мыло-кыдоос туспуктэме пуксё но соосты #МойФлаг, #ФлагМоегоГосударства, #УдмуртияЗаряжает хештэгъёсын социальной сетьёсы интыяло. Туспуктэмъёс пыр уногес калык тодоз та праздник сярысь, кунмылэн данэз эшшо но ӝутскоз, тужгес но будӥсь пиналъёс пӧлын.
Та акция борды итӥськизы ГИБДД-ын ужасьёс но, соослэн егит юрттӥсьёссы: сюрес вамен потӥсьёслы, машинаен ортчисьёслы соос сётъяло 3 буёло лентаосты, туспуктэме дэмен пуксё но социальной сетьёсы пукто. Тужгес устоосыз пусъемын луозы кузьымъёсын 24-тӥ августэ — соку «Динамо» стадионын ортчоз мугорез кыдатонлы но егитъёслы сӥзем фестиваль.
Со сяна, туннэ Россилэн куншетэз юнматэмын луоз Ижлэн тужгес ӝужыт интыяз — Шор карлуд котырысь радиовышка борды. Тӧлъя ветлӥсь флаглэн быдӟалаез котькинлэсь синзэ кыскоз — 9 метр пасьталаен но 27 метр кузьдалаен. Куншетэз юнматэм бере ортчоз эктонъя флешмоб.
Августлэн кутсконаз шаерамы мытэмын вал «Мон суредасько Россилэсь куншетсэ» ужрад: отчы пыриськизы пӧртэм ёросъёсысь, городъёсысь пиналъёс, суредаськыны яратӥсьёс. 22-тӥ августэ адӟытонзы усьтӥськиз Ижысь М. Горький нимо паркын: отысь валтӥсь аллеяын чуренак пуктылэмын суредъёс — парке вуисьёслы тунсыко потоз егит усточиослэн пӧрам ужъёссы. Татын ик усьтӥськизы нимаз азбаръёс но: одӥгаз пиналъёс кунпусъёсты суредалозы асфальт вылэ, мукетаз визьзэс сыналозы Россилэсь историзэ тодэмзы ласянь.
Тужгес но тунсыкоез ужрад ортчоз ӝыт — «Россилэн флагез улсын». Ижлэн урамъёстӥз мотоциклъёсын ворттылозы байкеръёс. Котькуд мотоцикл борды юнматэмын луоз Россилэн флагез. Байкеръёс нимысьтыз ульчаосты бырйизы — туэ «Кышкыт луисьтэм но ӟеч сюресъёс» нацпроект чотын тупатъямъёссэ. Озьы старт сётэмын луоз Киров нимо паркын, сюрессы йылпумъяськоз Берш нимо микрорайонын. Отын ортчозы вожвылъяськонъёс, Россилэн историезлы сӥзем визьсынанъёс. Вань люкаськем калык пыриськыны быгатоз куншетэз асфальт вылэ суреданэ.