#будудмурт выль ӵектосэз улонэ пыӵато Татарстанысь удмуртъёс

Ӵектосэ 24 удмурт, бигер но ӟуч пиналъёс пыриськозы. Соос удмурт лулчеберетэн, кылэн, сям-йылолъёсын, кырӟан-эктонъёсын но мукетыныз тодматскозы.

«Нырысь программаез малпам быдэстыны Балтач ёросын, озьы ик азьланяз малпаськом потаны Кукморе, Менделеевске, Мамадыше, Бавлы но мукет ёросъёсы, кытын дышетӥське удмурт кыл но лулчеберет «, — вера ӵектослэн кылдытӥсез, Татарстанысь удмуртъёслэн лулчеберетъя йӧскалык автономизылэн егитъёсын ужан ёзэзлэн азьветлӥсез Анна Самсонова.

Ӵектос 6 нунал кыстӥськоз. Нырысетӥ нуналаз пиналъёсты удмурт калыклэн историеныз тодматозы, кыкетӥ нуналаз удмурт эктонъёсты дышетозы, куинетӥ нуналаз сям-йылолъёсын тодматскозы, ньылетӥяз  – киужъёсын, витетӥяз – крезьгурен но фольклорен. Нош куатетӥ нуналаз анай-атайёсынызы, дышетӥсьёсынызы йылпумъясь ужрад ортчытозы. Со сяна, пиналъёслы «Толэзьлэн тусыз» нимо удмурт мюзикл возьматозы.

Пиналъёслы ужрадъёсты ачиз Анна Самсонова, Татарстанысь калыкъёслэн ассамблеяысьтызы ӧнерчи Марина Матвеева но удмурт кырӟась, Бавлы ёросысь удмуртъёслэн кырӟанъёссыя ӧнерчи Павел Александров нуозы.

«Азьланяз малпаськом ортчытъяны пумиськонъёс, пӧртэм форматэн лекциос но интерактивьёс. Бӧрысь пиналъёслэн будэмзы бере луоз пыриськемзы #БиГерд форуме, кудӥз озьы ик ортче арлы быдэ», — шуэ  Анна Самсонова.

Ӵектос лулчеберетэз утён, азинтон, быгатонлыко пиналъёсты шараян понна радъяське.

https://udmurt.media/udm/news/obshchestvo/55901/