Брангуртысь кырӟась песянайёс «тужгес дуно» данъет басьтӥзы
«Вань данъетъёс пӧлысь, кудъёссэ ми басьтылӥм, «Орден Ладошки» — тужгес дуноез, малы ке шуоно со пиналъёслэн дунъямзы», — шуо «Брангуртысь песянайёс».
Сӥё-дано ужрадын коллектив «Party For Everybody» кырӟанзэ быдэстӥз. Ӵапак соин песянайёс 2012-тӥ арын «Евровидение» вожвылъяськонын 2-тӥ инты басьтӥзы.
«Орден Ладошки» мерлыко дано пус нылпиослэсь улонзэс умоятон улсын ӟечлэсьтон уж понна сётӥське. Данъетэн Эдита Пьеха, Владислав Третьяк, Лео Бокерия, Ангелина Вовк но мукет тодмо адямиос пусъемын.
«Брангуртысь песянайёс» сяна, «Орден Ладошки» пусэз туэ Удмуртиысь эшшо одӥг мурт басьтӥз на. Со мер ужась, шаертодосчи но коллекционер Николай Михайлов.
Ватсалом, берло дыре «Брангуртысь песянайёс» гастрольёсын трос уг ветло ни, но котькытын дуно куноос луо. Кылсярысь, туэ гужем коллективез Санкт-Петербургын ортчем Гербере ӧтчазы.
https://udmurt.media/udm/news/obshchestvo/43104/