Брангурт суредъёс

«Брангурт суредъёс» тодмато гурт улонэн: татын азбарысь пудо-живот, чипы-курег — соос котырын шумприч бызьыло песянайёс. Со сяна, ӵыдонтэм гурт пейзажъёс.

Алексей Плотников Пичи Пургаын вордскемын, кивалтэ Ижкарысь искусствоосъя 11-тӥ номеро школаен. «Галерея» центрысь адӟытонъёсты радъясь ёзэтэн кивалтӥсь Наталья Чалова шуэ, таӵеен Алексей Плотниковез ӧз адӟылэ на, угось пейзажист сяна, Алексей Алексеевич рос-прос график но вылэм. Ассэ кылбурчи сямен но возьматӥз — вернисаж дыръя чуръёссэ лыдӟиз. Россиысь Суредасьёслэн союззылэсь ёзчизэ ӟечкыланы лыктӥзы культураысь тодмо адямиос: Кучыран Юри, Татьяна Михайлова, Василий Морозов суредасьёс, Ольга Александрова режиссёр. Удмуртиысь Суредасьёслэн союзэнызы кивалтӥсь Константин Резницкий чакламъя, Алексей Алексеевич туж быгатыса «кырме» адямиослэсь эмоциоссэс, адямиослэсь гинэ ӧвӧл — пӧйшур-тылобурдоослэсь но!

— А. Плотниковлэн графикаез туж рос-прос, — малпанзэ шарая «Галереяысь» огез куратор, суредась Тамара Михайлова. — Со суредаське сангинаен, нош сангинаен туж ӧжытэз художникъёс ужало, малы ке ӵемгес быръё эгырез, карандашъёсты. А. Плотников геройёсызлэсь тусъёссэс пыр-поч уг ке но суреда — кытӥ ке векчи штрихъёсын гинэ ортче, кытӥ ке буяса напчытэ — солэн ужъёсаз тырмымтэосыз, буш интыосыз ӧвӧл.

Сангиналэн курень буёлэз горд сюйлэсь (каолинлэсь) но железолэн оксидъёсызлэсь пӧрмемын. Та материалэз кемаласен уже кутылӥзы, соин суредаськиз Леонардо да Винчи. Малы меда асьме художник сангинаез быръем? Горд сюй тодэ вайытэ гурт улонэз но… дэриез! Ӵапак таӵе куренялэс-горд буёл адӟытонлы шуныт мылкыд пыӵатэ, суредъёслы удмурт шӧм сётэ. Алексей Плотников, шаермылэн зэмос патриотэз сямен, та сузьетэныз Брангуртысь песянайёсмес сӥлы каре.

Суредъёсын 24-тӥ тулыспалозь тодматскыны луоз «Галерея» центрын.

https://vk.com/udmdunne

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий