Брангурт дасяське «Артэ» фестивальлы

Интыосысь нылпи театръёслэсь вазиськонъёссэс куто на 1-тӥ оштолэзёзь. Но али ик тодмо ни – фестивале 10-лэсь трос коллективъёс пыриськозы.

Вераны кулэ, шаерысь нылпи театръёслэн та фестивальзылы кутскон сётиз Брангурт культурая юртысь нылпи театрлэн кивалтӥсез Ольга Туктарева . Таиз фестиваль ньылетӥез луоз ни. Нырысетӥез Йӧскалык театрын радъяськиз, Брангуртысь «Кузьыликар» нылпи театрлэн нимыз улсын. Берло аръёссэ ужрад «Артэ» нимаське. Вера радъясез – Ольга Туктарева.

«Гуртын улӥсь нылпиослы туж кулэ театр искусство. Шаерамы вань театральной коллективъёс, но гуртысь нылпиос кепырало ай городэ потыны, секытгес но. Соин ик малпамын та фестиваль. Ужрадмы паськыта. Коллективъёс трос но трос лыкто. Малпаськом ини, вуоно арын нош ик удмурт театре выжом, дыр, шуыса».

Туэ фестивале палэнысь но коллективъёс лыктозы — Бигер шаерысь, Башкортостанысь, Пермь улосысь.

«Азьвыл аръёсы тужгес но тросэз 16 коллектив люкаськиз вал. Туннэлы 10 коллектив куриськон ыстӥз ини. 1-тӥ оштолэзёзь соос йылозы на», — шуэ Ольга Туктарева.

http://www.myudm.ru/