«Библиоуй» акци кутскиз

Пичи Пурга ёрос библиотекаын ужасьёс туэ «Библиоуйзэс» быдзым ӟуч классик Иван Тургенев вордскем дырысен 200 ар тырмонлы сӥзизы.

Ужрадлэн одӥгез валтӥсь малпанэз — егитъёслы книгаез гажан пыӵатон, лыдӟиськисьёслэсь лыдзэс будэтон. Пичи Пурга ёрос библиотекаысь ӧнерчиос пӧртэм аресъемъёслы ужрад дасязы: пиналъёс пӧлын ялэмын вал солэн произведениосызъя суредъёсын вожвылъяськон. Со сяна ортчоз «Шудком» шудонлэн амалъёсызъя дасям литературно-интеллектуальной вожвылъяськон. Со но Тургеневъя нимаське — «Тур гениев».

«Тургенев кельше арлыдоослы но, пиналъёслы но, — шуэ Пичи Пурга ёрос лыдӟиськонниысь ӧнерчи Елена Абдрахманова. —  Кылсярысь, «Ася» нырысетӥ яратон сярысь ужез. Сое лыдӟиськод но, котькин вые со пушкы. Ведь пинал калыклэн сыӵе ик мылкыдъёссы — яратонэз нырысь тодо, сыӵе ик сюлэмшугъёсын уло».

http://www.myudm.ru/