Бесерманъёслэн этнотеатрзы кылдоз Удмуртиысь Яр ёросын

    Бесерманъёслэн этнотеатрзы кылдоз удмуртиысь яр ёросын 1

    «Со театрез ми Вортчаысь клубын кылдытӥськомы, инъетэз луоз фольклоръя «Крезь» коллектив. <…> Анай кылын йылолъёсты возьматыса, интерактивной спектакльёс пуктозы. <…> Со спектакльёсы учкисьёс но пыриськыны быгатозы, кылсярысь, сюан яке мукет йылолъёсты возьматонэ пыриськыны», — вера Яр ёросысь лулчеберетъя юртлэн методикая но ивортодэтъя ёзэтысьтыз методист Людмила Яковлева

    Солэн верамезъя, ӵектослэн валтӥсь ужпумез – йӧскалык бесерман кылэз улӟытон.

    «Бесерман кыллэн гожъяськетэз ӧвӧл, соин ик со бырон калэ вуэмын. Кытын сыӵе шугъяськонъёс вань, кылдо этнической театръёс. Со кылэз улӟытон понна инъет луыны быгатоз», — Людмила Яковлева.

    Кызьы вераз Людмила Яковлева, Вортчаысь клубын бесерман коркалы укшась висъет лэсьтозы, ӵапак отын вашкала йылолъёсъя спектакльёс возьматъялозы. Со сяна, этнотеатр бесерманъёслэн улон интыостӥзы гастрольёсын ветлон. Туннэ соос Яр, Глаз, Юкаменск, Балезино, озьы ик Киров улосвылысь Слободской ёросысь 41 гуртъёсын уло.

    Ватсалом, Азьмуртлэн грантъёсъя фондэзлэн вожвылъяськоназ эшшо одӥг бесерман ӵектос вормиз (490 сюрс манет пала). 2019-тӥ арын Юкаменск ёросысь Шамардан гуртын Йӧскалык бесерман лулчеберетъя улосвылкуспо этнофестиваль ортчоз.

    Тодэ вайытом. Азьмуртлэн грантъёсъя фондэныз 2018-тӥ арын ортчытэм кыкетӥ конкурсын Удмуртиысь 34 ӵектосъёс вормисьёс пӧлы шедизы. Элькунысь коммерци луисьтэм огазеяськонъёс 40 миллион манетлэсь трос коньдон басьтозы.

    https://udmurt.media/udm/news/kultura-i-turizm/44627/