Бесерман лулчеберетъя «Шундыен шунтэм сэрег» II элькун фестивале куриськонъёсты кутон мынэ Удмуртиын

Туннэ нуналлы фестивале пыриськыны мылкыдзэс Балезино ёросысь коллектив вераз ни. Озьы ик радъясьёс Глаз но Юкаменск ёросъёсысь, Ижкарысь но Киров улосвылысь куноосты возьмало. Чакланъёсъя, ваньмыз фестивале 250 пала адями пыриськоз.

«Ми возьмаськом бесерман коллективъёсты, малы ке шуоно та фестиваль улсын бесерман лулчеберетэз возьматоно – сям-йылолъёс, кырӟанъёс, озьы ик «Бесерман ческыт сиён» бесерман ӝӧк радъямын луоз. Ёросъёсысь чеберлыко киужъёсъя юртъёс бесерман мотивъёсъя мастер-классъёс (дасяло – ред.)», — шуэ Светлана Шутова, Яр ёросысь Лулчеберетъя но туризмъя центрысь ёзэтлэн кивалтӥсез.

Бесерман лулчеберетъя ужрад Михаил Федотовлэн вордскем палъёсаз — Яр ёросысь Вортча гуртын — но Яр каргуртын ортчоз. Люкаськемъёс кылбурчиез буре ваёзы, солэсь кылбуръёссэ лыдӟозы, Михаил Федотовлэсь музейзэ сӥё-дано усьтозы. Озьы ик фестивальын кылбурчилэн произведениосызъя ёросысь нылпиосын кылдытэм суредъёсын адӟытон ужалоз. Ужрадэз вашкала сям-йылолъёсты но туала улонэз огазеясь концерт йылпумъялоз.

«Бесерман лулчеберетэн али тросгес но тросгес тунсыкъясько, малы ке шуоно Кӧрбан но ми дорын ӵемысь радъяське. Вань адямиос, кудъёсыз ярато милесьтым «Бесерман крезь» коллективмес. Али соос Питере фестивале ветлӥзы, элькунлэсь данзэ утизы. Федотовез милям трос уг тодо, но берло дыре саклык висъяськом», — вера Светлана Шутова, Яр ёросысь Лулчеберетъя но туризмъя центрысь ёзэтлэн кивалтӥсез.

Тодэ вайытом, Бесерман лулчеберетъя «Шундыен шунтэм сэрег» I элькун фестиваль вить ар талэсь азьвыл Михаил Федотовлэн 55 аресъем котырес лыдпусэзлы сӥзьыса ортчиз. Соку ужрадэ Балезино, Глаз но Юкаменск ёросысь коллективъёс пыриськизы.

Туэ фестивале пыриськыны мылкыд карисьёслэсь куриськонъёссэс cultura-yar@yandex.ru, ya-metod@mail.ru электрон адресъёсъя куто.