Бесерман кылын нырысетӥ тезаурусэн тодматӥзы Глазкарын

    Бесерман кылын нырысетӥ тезаурусэн тодматӥзы глазкарын 1

    Со сярысь иворъёсъя «Удмуртия» агентстволы элькунысь бесерман калыклэн огазеяськонэзлэн кивалтӥсез Сергей Антуганов вераз.

    Солэн кылъёсызъя, кыллюкам бордын Москваысь кун университетысь, Экономикая вылӥ институтысь но мукет дышетсконниосысь тодосчиос дас арлэсь трос ужазы. 500 бамъем ужын бесерман кылъёсты ӟуч кылэ берыктэмъёс сяна, котькуд кыллэн вераськонын пумиськемез валэктэмын, соин ик со тезаурус нимаське.

    «Мон шуысал, валтӥсез — соослэн тезаурусазы пыртэмын милям бесерман алфавит. Со милям ӧй вал. Табере милям, луэ шуыны, бесерман алфавитмы вань, отын 38 буква пыртэмын. Табере луэ гожъяськыны асме бесерман кылынымы», — шуиз Сергей Антуганов.

    Со пусйиз, туж умой, интернетын та кыллюкамлэн аудиоверсиез вань шуыса. Адями кылэз лыдӟем сяна, солэсь чузъяськемзэ кылыны быгатоз. Азьланяз тезауруслэсь кыкетӥ люкетсэ поттыны малпамын — глаголъёсын, малы ке шуоно нырысетӥяз соос пыртэмын ӧвӧл.

    «Тодосчиослэн, мон малпасько, ноку но ужзы уз быры. Соослэн со, кызьы шуод, хобби. Ужало кин, кытын. Бесерман кылэз ярато но отпускъёсазы но, мар но вутто. Собере ми вераським ни пичигес ке но азбука лэсьтом. Мед со луоз азбука-а, букварь-а дышетыны, малы ке шуоно марлэсь ке но кутсконо ук», — шуэ Сергей Антуганов.

    Эшшо одӥгез валтӥсез ужрад, кудзэ Москваысь тодосчиос мыто — со оштолэзе Глазкар пединститутын ортчытыны малпам тодосъя конференция. Отчы люкаськозы бесерман калыкез, лулчеберетэз эскерись тодосчиос. Соос кунмылэн пӧртэм сэрегъёсаз уло ке но, одӥг тема котырын ужало — бесерман калык, кыл но сям-йылолъёс бордын. Таӵе пумиськонын котькудӥз тодосчи аслэсьтыз малпанъёссэ вераны быгатоз, лэсьтэм ужез сярысь мадёз, вера Сергей Антуганов.

    http://udmurt.media/udm/news/kultura-i-turizm/25533/