Башкириысь удмуртъёс анай кылын кылбуръёсъя элькун акциын вормизы

Акцие Башкириысь пӧртэм йӧслыко 4-85 аресъем адями пыриськыны  быгатӥз. Со понна ӵектослэн «ВКонтакте» огиназ анай кылын лыдӟем кылбурен видеоролик интыяно луиз. Толэзьлы быдэ люкам «лайкъёсъя» вормисьёсты бырйизы. Самигуловъёс ужрадэ тулыспалэ пыриськизы.

«Одно ик курон вал – крезьгуро калык инструментлэн шудэмез улсын аслад дӥськутэныд аслад кылыныд лыдӟоно вал. Ми лыдӟим «Вордскем кыл» кылбурез, кудзэ мон гожтӥ пиелы но аслым, ӵошен лыдӟим. Гуслиен шудӥз Александр Галиев, Выльгурт культура юртысь крезьгуръя кивалтӥсь. Ми тулыспал толэзьын со акциын нырысетӥ луим», — вера ачиз вормись, Выль Татышлы гуртысь Историяя но лулчеберетъя удмурт центрлэн кивалтӥсез Ирина Самигулова.